劫後狗熊傳

欺人之威不是威

聚眾鳩嗚遇鬼迷

三山五嶽支持你

道理唔通拼命擠

今次戰中都算好帶挈、甚麼都拿不到兼累街坊還不止、仲留低大大畢蘇州屎畀紫荊人嘆。雖然旺區清場尚算成功、但卻衍生一群鳩嗚（普通話“賺物”嘅諧音）青年出來。最弊家伙嘅就係鳩嗚青年（下稱鳩青）要嘅唔係真普選、而係要搞到人家檔生意雞毛鴨血。日前有一群鳩青集體迫爆旺區一家小商店、搞到人家不能做生意、店員想落閘避開他們又被制止、終於要勞動捕快到場才可以解圍。據講這家商店嘅職員在戰中期間開罪了佔領者、今次人家表面為鳩嗚而來、但實際上是專程為報復而來的。

其實這一招鳩嗚（構物）嘅招數與江湖兄弟慣用嘅一指「嘆茶」嘅招數十分相似。記得七十年代末期、灣區新建成的圓柱高廈六十樓的一家酒樓忽然被一群江湖兄弟包起全日生意。當時全場、由早茶、午飯、下午茶至到晚飯都被同一班人包起、而且每一張枱都坐着一人、並按照每枱嘅坐位數目開茶、搞到全日生意死晒火。據說事情起源是圓柱高廈閣樓的咖啡室一名侍應生服務態度惡劣、冒犯了當地社團大佬、而翌日酒樓就被人包起。雖然酒樓方面曾經請出江湖上有頭有面嘅前輩和巡捕房火計出面調解、但依然於事無補。結果由素有一代橋王之稱嘅古月大老闆親自出面擺酒兼封利是才能將件事擺平、後來還從中挑選部份合件事嘅人當護院、而一度成為城中佳話。今次鳩青迫爆小商店、而且亦買下一件物件、有人形容鳩青行動別出心裁、亦有人指此乃惡行不敢恭維。咁、唔知你又點睇呢？