全退保的啟示

每人月入廿五千

何須去求黃大仙

常言大話怕計數

不如務實早先鞭

某日聽阿邊個講解全民退保嘅好處、點不知、聽吓、聽吓、忽然聽到一則令人難以置信嘅數字。原來紫荊人每月人均收入是兩萬五千元。換言之、揸大掃嘅阿叔、洗碗嘅阿嬸、睇更嘅阿伯、個個每月都有兩萬幾銀收入。如果係真嘅話、人人都可以靠積穀防饑、社會上就冇老人問題。從前嘅人就係靠咁過一生、絕對唔似得今日嘅人咁徬徨。可惜月入兩萬五只不過是個統計嘅中位數字、而真正收人被人算到連斗零都冇得剩。今日人力係唔值錢、只有專業知識和高新技能才是生存之道。可惜紫荊城在這方面遠遠落後於獅城、高麗、扶桑等地。

呢嗱、並非在下又要潑冷水、所謂全民退保純層大隻講。點解？理由就係、如果供款額太高現在就要食粥水、如供款額太低退休後連粥水都冇得食。在供款人唔願意接受高供款額、兼且害怕日後回報額太低、加上政府眼見歐洲大國被全退保拖累、當然死都唔肯攬上身去搞啦！試問雞同鴨講、又點會聽得明對方講嘅嘢呢？

請看看、今日紫荊城生無安樂窩、死無葬身地、醫療打倒蹆、學位仆崩鼻、水客搶貴米、基層呻運滯、社福排大隊、教育遇鬼迷。點解會咁？一切全因政通人和皆欠奉、滿城怒氣鬧翻天囉！假如紫府能夠做到政通人和、政策就較容易推行、可惜官老爺思維僵化以致步履踉蹌、飯盟與電制兩幫人馬終日為私利拉刀拔劍、把市民嘅期望拋諸腦後、咁咪做鬼都唔靈囉！戰中只是民憤爆發前的一場預演、若政府能夠從中吸取教訓和反省嘅話、這棵金紫荊尚可得救。

其實紫荊城嘅問題不應是所謂若未來嘅老人問題、而係眼前所有人嘅問題。如果能解決眼前問題、老人問題自然不成問題。相反、如果解決不了眼前問題、無須等老人問題出現、恐怕現在就快玩完了！開講有話、禁微者易、救末者難吖嘛、相信紫府應該係時候面對現實重新出發啦！係嘛？