純屬抽水

毒仔冇得玩

當堂眼坦坦

發難既不能

惟有扮花旦

被邀請成為七一壽宴坐上客嘅名單已經公布。機乎所有幫派嘅大佬名字都被列在名單之內、惟獨是涉嫌染上毒癮嘅幫會人士、包括丐幫嘅常無、拳頭幫嘅慢版、香梗眾痴嘅籮半蔥、香梗拚討嘅巫婆淨、烈血凶聞嘅病蟲太、以及拚討主義嘅散戶、當中包括豬仔滴、螻小蟻、鹽蟲妖等人嘅名字不在被邀名單之內。殊不知初嘗尊貴滋味嘅豬仔滴竟然覺得冇飛屎、於是公開要求所有反派同道集體杯葛今次嘅紫荊堂壽宴、直至紅家會改變初衷和發請柬畀佢哋一群毒仔毒女為止。呢嗱、唔知到佢係真豬兜抑或係假豬兜、居然連啥叫做畀面派對都唔曉、唔通佢哋以為人家冇咗佢哋係唔得嘅？

嗱、話到明係畀面派對、當然只會邀請嗰啲在江湖上有頭有面嘅人物來當嘉賓架啦！唔通走去榕樹頭邀請講古二老賣田李和陳四姑、以及通街主教倭軍陳和賣生果嘅皮佬𡅏等、一眾唱衰紅家會為己任嘅人來做嘉賓咩？所謂人貴自知吖嘛！既然豬仔滴出得嚟做毒仔、冇理由唔知到紅家會係視毒如仇嘅。因此、豬仔滴今次詐型係假嘅、要抽七一嘅水來煲翻熱自己個字號才是真的。日前常無和痴瘋不就是糾眾跑到金紫荊講場、兜塊黑布冚住棵金紫荊、而博得全城報章免費為佢哋宣傳嗎？再講、從前紅家會請客亦有發帖請常無、但當他入場後就立即上演大龍鳳鬧爆人家個場、最後還要勞動保安人員抬佢出場至係。經過咁嘅教訓之後、主辦機構當然唔會再重蹈覆轍架喇！由其是今次係總舵主親自到紫荊堂來主禮、主辦單位絕對不容有失。所以在邀請嘉賓方面、自然會顯得更加小心和謹慎。其實、即使受到邀請嘅反派人物之中、亦唔見得有幾多個會安安份份的飲一餐嘅。江湖上流傳、剛退下火線不久嘅大撞幫元老涼茶杰為咗提升其江湖地位、將會切法靠近總舵主身邊、爭取握手和合照嘅機會。嗱、涼茶杰嘅一廂情願能否實現、就真係要睇過至知。之但係、唔使問阿貴都知、總舵主身邊嘅守護人絕不會少到那裡去的。