探索廿三條計嘅死因

空有鐵腳冇鐵腕

偷雞不成蝕老本

當年反轉廿三堂

贏得今日冇王管

紅家會紫荊分舵首屆香主鐵腳華為着維持轄區穩定、便提出合廿三堂之力去剷除花家幫嘅勢力。本來各堂揸拂人都答應支持。殊不知在決定性時刻富貴堂堂主錢得進忽然調轉槍頭摧毀全盤計劃。據說錢堂主是為了捍衛對外交流自由才犯天條的。之但係、在這個要銀唔要品嘅世界裡面、恐怕連阿茂都唔會相信。因為破壞廿三堂聯手等同跟總舵主過唔去、呢條係死罪嚟吖嘛！因此、錢堂主點解要明知故犯、一直都是個迷。直至日前遇見一位行商界嘅朋友阿邊個、並且在我追問之下才給予我一些啟示。阿邊個並無直接回答我嘅問題。他只反問：“假如你係我會點做？”就是被他這麼樣一問、我的疑團便解開了！

所謂行商者就是到處去賺錢嘅人、那裡有利可圖他們就跑到那裡去。因此行商朋友唔止在紅家會嘅地頭賺錢、更多的就是在花家幫及其盟友嘅地頭賺錢。他十分清楚、如果開罪紅家會便會失去神州的一片天、但開罪花家幫就要失去更多了！因此、在兩虎雙爭之下、必須要找到平衡點才能保命。萬一不能兩邊討好、就惟由“抽生死簽”來決定由誰人去當義士。心水清嘅朋友大概早就注意得到、在空能組裡面所有與錢銀交易有關嘅界別席位都是被那些聲稱“愛乜愛勿”嘅亂制派人士取得、而教頭、法術、資訊歌伎、把脈、量地、社哭等紅家會吹唔漲嘅界別席位均被非亂制派人士佔據。由此可見、紫荊堂百年傳統唔係話改就改、雖然表面上是吵吵鬧鬧、但骨子裡卻是井井有條的。在公開選舉方面亦唔例外、泛㒼與亂制兩派人馬各佔席位比例機乎每一屆都差不多。即使在今次有七名品土派入物進入聚異廳而形成三角鼎立之勢、但正反兩方面嘅勢力比例依然係咁上下。試問世事又點會話巧合得咁交關？大家都心裡明白、如果廿三堂聯手成功嘅話、花家便冇埞企。須知到花家勢力遍及全球、強如灰熊京這號人物都被花大叔迫到走頭無路、何況只係區區小行商？因此以其眾死死、不如獨死死好過。既然錢堂主抽得一支死簽、惟有抵吓諗去孭起“食碗面反碗底”嘅罪名。只有咁做、整體利益才得以保存。