屎尿屁中的選擇

選擇當前屎尿屁

當然臭到無鄰里

無奈從中挑一件

但求不必忍毒氣

經過連番思想掙扎之後、結果昨日連新聞都未讀便跑去投票站投票。今午扭開公仔箱就聞得大妖蜓搞嗰個甚麼「泥洞計劃」原來係一部輸血機器嚟、搞到落敗嘅咕哩幫頭目受難可姐姐對住個公仔籍猛呻嗰部嘢輸錯血、令到佢同埋幫主剢人李因缺血而躀低。坦白講、假如選民尚須要佢哋嘅話、莫講話泥洞計劃啦、就算用鐵筆都撬唔走佢哋啦！係嘛？總言之、希望經過上屆教訓之後、今年當選嘅尊貴莫再將議事堂弄得比公廁還要臭、更加不要再令選民失望、並能夠實實踏踏的多做實事少作混吉。呢嗱、願念縱歸願念、但實際情況就難講矣！

呢嗱、講到呢度選舉結果仍在點算之中、但已經顯示有數名泛㒼老雀躀低咗、取而代之嘅係自決派和本討派的新雀。從街坊嘅取捨看來、人們對於揸拂當局嘅不滿程度已經很明顯、同時亦顯示出對於那些𧦠神騙鬼嘅嘩眾之流深感厭惡。之但係、從新雀嘅背景可以想象得出、政治對抗情況是不減反加。議事堂是否會如上屆一樣變成演武廳、暫時不得而知。之但係、口交加劇則勢將難免、而且堂外對抗次數可能會更加頻密。換言之、如果閣下滿以為呢趟可以在一個平靜環境之中食餐安樂茶飯嘅話、大概要失望了！早前坊間流傳、指今次選舉結果早在金紫荊揸拂人預料之中、甚致有陰謀論話係揸拂人刻意安排、從而增加其冧莊機會。當時在下只覺荒謬、但現在睇起嚟又確係有啲似曾曾嘅感覺。仲有呀、曾經是票房大熱門嘅常無、今次只能以低票數僅僅擊退娜渣而奪取得末席、都可謂執番身采。這結果足以證明、今次傘兵之所以能夠輕鬆入局、與泥洞計劃不無關係。這亦足以證明、見慣世面嘅花大叔確實是個“能者用之、廢者即棄”嘅用人高手、所以早就準備好一個泥洞計劃來清除瘀血、並將投資放到可以造就嘅年輕人身上去。因此、在下可以大膽預言、除非花大叔對紅家嘅政策有良性轉變、否則城中嘅政治對抗將會比之前更加激烈。大家不妨拭目以待吧！