勿步大丈夫後塵

從前有個大丈夫

贏了牙較命嗚呼

今日猛男超積極

八萬歡呼當靈符

剛剛抓着八萬個like進人聚異堂嘅新貴豬八萬、繼報巡捕房全家遭受恐嚇之後、又以避開仇家追殺為由、表示要舉家遷入聚異堂居住。坊間有人質疑、呢壇嘢究竟係真唔係？但在下相信係真的、因為豬八萬嘅志向書清楚闡明、所對抗嘅係紅家會紫荊分舵、民生霸權、邊疆鄉語堂、以及陀地組織。相信係人都想象得到、咁搞法無疑係茅廁點燈找屎是也。呢嗱、就在月前之嘛、江湖上赫赫有名嘅黑幫龍頭大佬尚喜仔焫㷫咗條大水喉、就搞到天下無立足之地、惟有乖乖哋從外地返來向巡捕房舉手。試問區區豬八萬又有憑乜嘢本領去當萬人敵？無可否認、豬八萬利用蟻民嘅仇官仇富心理作為進入聚異堂踏腳石、的確選對了題目。之但係、樹敵太多始終都係唔化算嘅。

在下記得在一九六七年暴亂期間、綽號大丈夫嘅阿彬係孖葉電台嘅當紅播音員、佢每天都在自己嘅節目之中以「你班低能無恥、下流濺格嘅乜仔、你哋即管嚟啦、我唔怕你架」去罵正在從事街頭抗爭嘅示威者。甚至在收到恐嚇之後、還叫對方即管放馬過去。結果在某日上午阿彬與其弟阿海駕車上班途中遭遇到殺身之禍、兄弟兩人在車箱內活活被火燒死。當下本城亦係鬧政治對抗、社會走向兩極化。在下記得、年前金紫荊行企會內居然有位權貴大聲疾呼、本城只有官不聊生而無民不聊生。咁你話嘞、食民資民膏食到肥頭耷耳嘅人、居然講出啲咁嘅風涼話、係咪連死火山都被佢撻着埋呢、吓？！今次爆出聚異堂新貴遭受恐嚇、以致當事人及家人嘅人身安全均受威協、簡直係離晒大譜兼無法無天啦！係嘛？！呢嗱、各位拚倒派嘅新貴、凡事皆有大眾公論、所以千祈咪步大丈夫後塵、將自己當成係正義超人至好。總之請記住、大家都只係求財而唔係要搏命、無須吓吓都去得太盡、留番條路算係畀自己行就包保冇衰架喇！