今日記招

你有金鐘罩

我備鐵布衫

欲看誰家硬

惟有鬥一番

呢嗱、金紫荊揸拂人施威帶領大帳房掌櫃抓錢華、車居部部長冰涼張、及兩名有關主管出席記招、解釋橫兜事件嘅來龍去脈。在整個記招嘅過程裡面、五大巨頭之中只有施威面露笑容、而抓錢華和冰涼張兩人則全程執到金都唔識笑咁款。故此誰人心中冇壓力、誰人心中有壓力、已經一目了然。不過如果有人諗住睇好戲嘅話、恐怕要失望了！因為大家都是成年人、即使有過節亦唔會愚蠢到當着全城老記面前揦高自己個肚皮畀人睇吖嘛！係冇？

其實、今次記招只能以“雷聲大、雨點小”來形容。豬八萬燃點起橫兜呢個火頭、有人滿以為呢趟就算燒唔死施威、亦可令到佢遍體鱗傷。殊不知施威原來亦係有備而來、並以推則閃避御招數、左來左撥、右來左撥、撥到大掌櫃和車居部長連嘴都貶埋。雖然係咁、但結果原來又係在整件事嘅過程裡面、一個人都沒有錯。唔單止係咁、施威還公開讚揚公人隊伍做得拂、做得好、好到冇晒譜。更諷刺嘅就係、搞吓、搞吓、居然搞到橫兜這組病菌忽然之間變成施威嘅補品吖嘛！吓、點解？答案咪就係、抓錢華跟總舵主握兩次手都變成白握囉！從呢件事裡面可以見得到、有人希望藉着橫兜呢枚狼牙棒去打碎施威冧莊嘅春秋大夢、但卻連自己握着嘅係一碌生蟲拐杖都唔知到、搞到偷雞唔到蝕拃米、令到一件不合理嘅事情獲得合理解釋、都可戇居到唔戇居咯！呢嗱、究竟在橫兜事件裡面有冇官商鄉黑、那就見仁見智。注於有人一口咬定施威跟響樹幫必有係蠱惑、我就唔係幾認同。試問一個人在三年前曾經被一群人布置一個“黑色飯局”屈到自己機乎斷氣咁滯、至今尚是猶有餘悸之際、如果係你又會唔會對這幫人毫無戒心？所以嘛、若說施威跟響樹幫嘅恩怨越結越深、可信性反而更加高一些。