點只衝擊咁簡單

揼雞又禁錮

看來太可惡

勿當無厘頭

秘練震天鼓

日前金紫荊大武館又爆發學師仔衝擊事件。據說係代表學師仔出任當然長老嘅大炮因發放流料、撻着咗守在會議廳門外嘅一批火爆同門、而引發起一場集體衝擊。期間總教頭孖啡森和大長老將硬李等數人被困幾粒鐘。雖然學師仔不斷在門外喊將硬李出去對話、但會議廳大門外嘅一對門搊卻被人用掃把柄閂着、裡面嘅人根本無可能走出來。呢嗱、這種手法跟當年戰中期間出現嘅（高舉雙手、口喊和平、雙腳在猛踢對方上下五寸之處）招數猶如同出一轍。雖然宮能界代表孽猿從後飛身撲出來撤賴一切都係長老會嘅錯、但亦不能抹掉有人在非自願嘅情況下被禁錮數小時嘅事實。

過去嘅學師仔衝擊事件顯示、每一次都是由捕快將被困者安全帶走而告終。咁即係話、學師仔嘅衝擊除咗帶給巡捕房麻煩之外、就連個屁用都冇。嗱、如果咁就認定呢啲行為係戇居、恕在下不敢苟同。因為我絕不相信有人會花時間去演無聊劇。曾經有人質疑、假若被圍困嘅長老索性不退不避、呢班學師仔又能夠對佢哋點呢？萬一有人受不起壓力、先行昏倒、繼而魂歸天國又點算？究竟佢哋有冇諗過後果？其實成件事已經很清楚、學師仔只須出力而無須用腦。因為每當件事搞到咁上下嘅時候、即使長老不打求救電話、亦會有人代勞、當捕快到場後就是學師仔散水之時。加上有人不斷鼓吹勇武索求、所以這類雜亂無章嘅鬧劇才會一演再演。咁又係嘅、所謂曲不離口、拳不離手、意思即係常常演練才能夠保持實力。呢嗱、館內衝擊除咗能夠維繫着學師仔在呢方面嘅熱度之外、還可以透過一系列嘅宣傳去渲染其它各大中小武館嘅學師仔、到咗適當時機再將佢哋推上街頭、必定大派用場架喇！吓、唔信？那就拭目以待啦、垃圾會大選之前必定有嘢過你睇。