2016年1月15日星期五

爛戲一齣



你既口糠糠
我來鬧爆廠
年年皆一樣
上演大隻廣

前日講督在垃圾會宣讀未來報告時、長無忽然抓住個曲奇餅罐飛身撲向演講台。點不知、長無在臨門一腳發軟蹄被保安人員制止、而那個餅罐則脫手掉到地上去。正當人人戥講督吃不了曲奇餅罐而唔抵之際、大隻忽然提起一枚臘燭頭長杆、一邊揮舞、一邊叫喊的直衝演講台、但剛走了幾步就被保安人員截住。與此同時、另一邊嘅慢搣忽然企起身大罵講督只管擦阿爺鞋而罔顧民生、並舉起一張寫有抗議字句嘅紙牌準備離開座位之際、便即被保安人員撳住。就係咁、呢三位仁兄又係被提早收工去矣!

呢嗱、雖然呢齣戲年年上演、年年冇新意、但始終要演下去、如果當演員嘅人交唔足戲嘅話、實在難以向觀眾交代的。雖然一般窮街坊從不敢對未來報告寄以厚望、但對於那群靠賣沙賣石賣磚頭發財嘅老闆們來說、這份報告絕對是利害攸關的。未本報告指明不會減辣、而無顯示要進一步修緊這個金光圈。咁即係話、磚頭市場可以維持現狀、亦即係話磚頭照賣、大財照發、此乃皆大歡喜吖嘛!坦白講、今日本城嘅問題並不是甚麼加辣減辣、而係夠唔夠公家房屋畀買唔起樓嘅人住。以衣、食、住、行四項民生基本須求而言、住就是目前最嚴峻嘅問題。總言之、呢個問題一日不獲紓解、民間嘅怨氣必定有增冇減、再係咁繼續惡化落去、肯定會出現物極必反嘅情況。唔信?咁、閣下不妨等一等、好快就有版畀你睇。如果無估錯嘅話、寶島選民寧願冒險選擇滿腦子島獨思維嘅蔡英子當新任島主、都唔要由藍營嘅豬柳倫來擔任。理由就係、藍營統治期間太過重商輕民、以致民怨激增、所以大多數人都唔肯再聽佢哋支笛吖嘛!結果就快揭曉架喇、拭目以代啦!

12 則留言:

  1. 我對凸首屍症報告無乜期望,對嗰班做馬騮戲嘅小丑演技亦感覺唔到新鮮!

    至於台灣,就等於曼聯,炒咗莫耶斯,換個尹高爾,會帶來新鮮感,擁躉陶醉完之後,尹高爾即變成過街老鼠!道理好簡單,現實即係現實,好多野係無得改變,奢望轉變,只是自己一廂情願吧!蔡英文變成尹高爾,只是時間問題!

    回覆刪除
  2. 睇左咁耐戲,早已經睇到冇晒感覺,而家連對香港前景都睇化埋喇,係龍係蟲都好,都係D後生仔造出來嘅(無論係咪被騙),亦主要係佢地受返(雖然亦有好多無辜被累)。世事無好壞,只有因果。

    回覆刪除
    回覆
    1. 對、每一代年輕人都有自己想法、但因果是不會說謊的。

      刪除
  3. 域兄晚上好,
    政治唔係個個人都中意搞,但基本民生搞唔掂民怨就會沸騰,

    頻頻撲撲為住屋
    冇個竇口要露宿
    貪曾手尾施歪受
    惟有趕煲冇米粥

    回覆刪除
    回覆
    1. 華娃兄午安、
      對呀、所謂民生無小事吖嘛!

      既然有人做阿福
      無須自己打到仆
      前人種果後人接
      不是笑時便是哭

      刪除
  4. 97年母親遺言,說香港人是管不了香港人的。當時我還不信,因為電視裡人人都高唱著“明天會更好”。

    回覆刪除
    回覆
    1. 勢估唔到成蟲大哥從前所講嘅「X 國人係要被人管」呢句話居然應驗咗喇!

      刪除
  5. 以為搵個貼近民生、民意的,唉……
    總之邊個都好,最後都會被金錢所同化?

    回覆刪除
    回覆
    1. 總之民主也好、共產也好、背後無銀皆不可....

      刪除