由天氣預告講起

唔怕貨比貨

最怕唔知錯

水浸眼眉毛

才知闖了禍

近日本城氣溫驟然下降、聞說這是近50年來最寒冷嘅一次。花旗天文台提早十日八日前就大喊十、指本城將於1月24日（周日）上午8-11時會落雪。扶桑自然跟住大佬吶喊、指本城氣溫將於1月25日（周一）跌至接近0度以下。然而我哋嘅天文台卻實牙實齒咁話、氣溫只會維持在9-11度之間、新界地區可能再低2-3度。點知好嘅唔靈醜嘅靈、在24日早上城中真的出現飄雪現象、而氣溫亦曾經低過0度。天文台惟有面懵懵咁、將預測溫度再三調低。呢鋪都可謂抬棺材甩褲、失禮死人咯！

呢嗱、勢估唔到、今日連我班街坊都話咪信天文台。唉、誰叫咱家天文台唔爭氣、居然衰喺外國勢力手上咩？！就在兩日前之麻、阿邊個尊貴在議會期間質問咱家環境廳廳長、何解天文台不是歸環境廳管、反而係隸屬經濟廳、仲問是否連報告天氣都有經濟考量。點不知廳長大人連諗都唔使諗就話“你同我定”並強調無論天文台隸屬那個廳、都可以透過跨部門合作發揮功能嘅。難怪有人話、今時今日金紫荊府衙嘅頭頭、雖然講手未贏過、但牙較就未輸過啦！廳長大人講嘅話、聽落就真係霸氣十足兼自信爆棚、但實際上只係自暴其短而矣！試問還有那一個部門有能力向天文台提供、比天文台更專業、更詳細嘅天氣資料呢？這不就是此地無銀三百兩、間接承認係有特殊嘅考量？依我睇、嘅然呢家天文台嘅預測係咁靠唔住、倒不如嗱嗱聲將之摺埋個、並順手將外國嘅天氣資料牽過來據為己用、咁就保證靠譜架喇！咁做唔單止節省時間、金錢、物力、人力、仲連員工福利、退休金等一系列支出都慳埋。更重要嘅就係、無須吓吓被班大反派追住嚟將軍咁將啦！如果怕掉進「新版權法」嘅法網而作法自斃嘅話、那就直程將天氣報告外判畀花旗或扶桑去做。所謂做唔嚟畀人做、管唔嚟畀人管吖嘛！今日紫荊城之所以鬥生鬥死、無非都係想咁啫！係嘛？！