又玩甩轆

博你糊塗又一招

刁橋扭擰過板橋

廢話連綿今古秀

七情上面唱通宵

擾攘多時嘅闆拳法第二讀、終於在大部份飯盟尊貴決席之下通過。常無話、由於二馬基未能用盡其發言時間、以致在休息室瞓覺嘅飯盟尊貴不能及時趕回議事廳、才被亂制派偷襲成功。常無強調錯不在二馬基、而係佢自己嘅協調工夫做得差喎！呢嗱、這種令人睇到嘔嘅（人數啱啱夠、票數一面倒）甩轆把戲玩完又玩、無非是要告訴大家、今次闆拳法之所以通過二讀又係純屬意外。嘩、無常咁就想蒙混運關、會唔會太過低估市民嘅智慧呀？坦白講、假如闆拳法真係如飯盟所指咁窮凶極惡嘅話、今次班甩轆尊貴全都係千古罪人嚟啦！試問、點可能隨隨便便發兩句噏風當無數？

第三讀是否又係靠甩轆通過、目前言之尚早、但肯定會通過的。顧名思義、闆拳法就係老闆專用嘅拳法、故此係老闆嘅人都會重視。然而是否有「陰招」隱藏在細節裡面、咁就好難講喇！但起碼有批網民係咁諗、飯盟雖然未必真係咁諗、不過就真係騎咗上虎背。早前有位議事行家曾經講過、飯盟跟外商有深厚交情、所以絕對唔敢搞垮闆拳法。因此佢話唔會眼光光睇住飯民一邊在網民面前充好人、一邊又不愁因議案被否決而失信於老闆、而自己就做傻仔義務替人家敲鑼打鼓為闆拳法開路咁戇居。呢嗱、回頭望望二讀係點樣獲得通過之後、就發理那位行家所言未嘗冇道理。假如闆拳法真的落空嘅話、老闆們就會唔高興、萬一捩手關掉幾條大水喉嘅話、豈不是有人會因過度脫水、而變成謝賢嘅細佬謝埋？因此、無論呢匹布點拉法、又或是拉到幾長都好、但結果依然跟以往上演嘅把戲一樣、以三讀通過告終的。