制水背後

鬧來鬧去鬧空墟

妖言之下有盲隨

今日兩營刀鋒過

頹成勢劣眾當衰

近日施威嘅所謂「喊城中各武林世家勿向八大武館泵水」嘅言論、在城中不脛而走、而且成為黃藍兩營互片嘅新焦點。有人指、施威嘅目的係要以制水方式、進一步打壓大武館嘅武術自由。但明眼人一看便知、呢種講法亦是言不由衷的。因為八大武館之所以能夠成為山姆大叔嘅花拳發揚地、並唔單止係水源咁簡單、更多的反而係心態上嘅問題。江湖中早有傳聞、武林名宿皮佬禮在戰中期間所泵嘅水、是遠遠比不上實際消耗。因此才會另人連想到、有可能是本地武林世家暗中提供水源。因此施威今次大概是向某些「當年著乸衣、今日食爺飯」嘅人物宣讀聖旨而矣！

俗語有講、管麻鷹不如管雞仔吖嘛！既然無法阻擋手瓜起「展」食嘢唔畀錢嘅山姆大叔將花拳輸入八大武館、那就惟有加強對大武館嘅管控、好讓阿爺嘅紅拳也能大展拳腳。要辦妥呢件事就必先要搞掂幾條大水喉。否則你有你搞防禦工事、人家有人家繼續泵水嘅話、到頭來連條堤霸都會被沖冧埋架咋！現在施威已經把話講明、假如有人膽敢私底下繼續向大武館泵水、或試圖窒礙紅拳發展嘅話、即意味着是跟阿爺對着幹、後果是相當嚴重的。對於那些醒目嘅投機者而言、絕不會戇居到為着向幾家大武館泵水、而明且張膽的去捋阿爺嘅虎鬚。但係、如果有人認為憑藉制水一招、就能夠令到花拳衰落、由紅拳取而代之嘅話、咁就連諗都唔使諗。所謂你有張良計、我有過牆梯吖嘛！睇怕在未來日子裡面、大武館呢個終極洗腦場依然是兵家必爭之地至係。