勇武誤事

勇字胸前掛

吹來我最誇

買板唔知埞

仲要誇啦啦

唔知係咪城中嘅政治氣氛令到人人㷫烚烚、個個火攻心、芝麻綠豆般嘅小事動輒成災。在不久之前坊間流傳一個故事、講及一名茶客將舔過嘅茶匙放入糖罌內舀糖舔時、被茶餐廳老闆發現而爆發口角。期間有人相約到店外隻抽、結果餐廳老闆不敵受傷被送往醫院救治、而茶客就被帶返巡捕房落案控以傷人罪。本來以為事件就此告一段落、殊不知傷者居然不治而死、巡捕房惟有將案件改為誤殺案處理。換句話講、本來被控傷人罪嘅茶客將會面對殺人嘅指控。

以上故事反映出武力不獨止解決不了問題、甚至會令到事件更加糟糕。舊時人們揶揄讀書人手無搏雞之力、故在書生前面加上孱弱二字。所謂時移勢易、今日嘅大書生心口鑲勇字、已非昔日嘅孱仔可比。所以那套「秀才遇着兵、有理說不清」嘅講法已經不管用、取而代之就係「捕快遇上大書生、縱然有氣也難呻」矣！今日嘅大書生為着追求自己嘅政治理想、實行勇武抗爭。在上次「和尚打傘」一役所見、大書生嘅勇武衝擊確實把巡捕房弄到筋疲力盡、亦令到受牽連嘅商鋪雞毛鴨血。若不是幕後監製洞悉、講府欲以時間去將他們推向市民對立面嘅話、恐怕那場運動絕不會和平告終的。從大書生嘅尚武態度看來、有人自以為勇猛無匹、其實並不盡然。上述茶餐廳嘅故事正好是一面鏡子、反映出勇武是要付出沉重嘅代價。例如故事之中嘅人物、起初可能係諗住拋下浪頭、點知弄假成真打起上來。滿以為傷人罪若不是罰錢、守行為、就是踎幾個月花廳抵數、殊不知忽然之間自己竟然要面對殺人指控。呢個情況、對於那些滿口勇武嘅人物來講、真係見到閻王都唔知發生咗乜嘢事啦！係嘛？！