阿姐同你講心痛

阿奇生阿奇

嗌痛不皺眉

大話串連編

拗撬嘴不離

呢嗱、女人係唔係特別容易受傷我唔知、但係容易心痛就剛剛見識過。就在幾日之嘛、城中就有兩位作風強悍嘅女性先後公開話自己個心好痛喎！首先係講府大總管冧井話、紫荊大武館門生嘅衝擊行為破壞社會文明令她心痛。其次就係皇家大鑿梁夢吉嘅高足（門生頭領）梁厲摑姐姐話、總教頭孖啡森譴責參與衝擊嘅同門令她心痛。呢嗱、坊間唱反調人士顯示、以上兩人心痛係假、嬲爆至係真嘅。前者一直唔老like大武館門生整天為她添麻煩、氣得佢嬲爆爆至係。後者眼見班同門笨手笨腳搞到件事弄巧反拙兼累佢孭鑊、而嬲到連暗瘡都標埋出嚟。唉、如果真係咁嘅話、豈不是假到連阿媽都唔認得？

呢嗱、門生行為過激被人罵一啲都唔出奇。之但係、有人跑出來一面話大門生咁衝動係冇必要、而另一方面又喊大教館千祈咪責罰滋事者、咁就確係阿奇生阿奇。俗語都有話、食得鹹魚止得渴、意思係指無論有何苦衷、無論對與錯、總之出得嚟行預咗要還。因為這就是種瓜得瓜、種果得果、因果是也。照計、咁係正常不過嘅事。但係偏偏有人妄想要違反因果循環嘅道理、刻意在大門生嘅勇武心態越趨於激烈之際、跑出來捩橫折曲反指被圍困嘅人該燴、甚至有人跳出來喝令大武館不得懲戒犯規門生。難怪有人話、某些人為求達到一己目的、不惜犧牲別人嘅一生。因為當門生在學習期間便不斷將“犯錯無須承擔責任”的訊息打進他們腦袋裡面、然後讓他們帶着這種信念踏進我們的社會。到時後果係點、大概唔使我多講啦！係嘛？！

話時話、在過去百多年以來、本地人均生產總值雖然比不上今日之高、但基層市民從來未有過像今日般的怨氣、只見人們努力為生活而奮鬥、終於擦亮了東方之珠這個招牌。然而、今日字面上顯示本地人均生產總值擠身於亞洲前列、而且本城也被選為外國人最佳居住成市之一、但本地人嘅貧窮和失落感覺反而比之前任何時間都來得更加嚴重。歸根結底就是基層被忽視、以致社會上嘅資源分配嚴重失衡、而加速貧富懸殊嘅差距。也許有人將大教館門生嘅激烈行為歸咎於幕後政治黑手、但若不是我們嘅社會已經無和諧可言嘅話、莫講話政治黑手啦、即使係親生爹娘都使佢哋唔逳啦！依我睇、跟講府唱反調之所以有咁大嘅市場、其主要原因係離不開“基層絕望”這四個大字咯！世間上之的以有咁多紛亂、大概亦係莫過於此而矣！