揭盅

有條細蚊冇人性

篤爆教頭唔夠秤

務求上位搏偷雞

裝神弄鬼最虔誠

大教館長老會按照老規矩閉門造車、投暗票決定是否聘任蚊蚊陳教頭為副館長嘅決定、終於揭盅了！有份參與投票嘅大學徒代表二馬因假借替蚊蚊陳教頭抱打不平為名、公然違反保密協議、把否決聘任蚊蚊陳為副館長嘅數據大公開。二馬因指出、長老會否決蚊蚊陳的其中一個理由、就係蚊蚊陳教頭的資格只屬第二班、根本無能力去教導第一班嘅大學徒。在下真係分唔出、究竟二馬因係幫蚊蚊陳、抑惑係驚佢輸得唔夠痛快。連蚊蚊陳嘅死穴都篤埋出嚟、你叫佢以後仲點去跑江湖混飯食呀、老哥？！

呢嗱、其它針對蚊蚊陳個人私德嘅嘢就無謂講、淨係講蚊蚊陳唔夠秤呢個理由就足以否決聘用他為副館長。須知到在大教館裡面嘅一班教頭多的是、要在他們當中找一個人出來當副館長不應有任何難度。試問又何必偏偏要一波三折的去揀選一名二流教頭呢？唔使問阿貴都知到內裡必定有蠱惑啦！吓、究竟係乜嘢蠱惑？唓、淨係睇吓飯盟為呢單嘢所花費嘅人力、物力、以及時間就知到點解啦。係嘛？更加諷刺嘅就係、身為武術界議會代表嘅茂利源呢頭要求長老會打破傳統嘅暗票規則改投明票、嗰頭又話傳統上從來未發生過揀卒會提名人選被長老會否決嘅先例。照咁睇嚟、茂利源求贏嘅時候就要求廢除傳統規則、當輸了之後就拿傳統規則來做反擊武器。呢啲咪就係典型政棍嘅所為囉！明冇？

好端端一所專門出產精英嘅金紫荊大教館、今日居然淪為政棍相爭之地、連唔夠斤兩嘅人都要擺上神台接受供奉、咁唔係呃神騙鬼又係乜？紫荊城某些中小級教館就係被一群年資深、功力淺嘅教棍搞到武術水平越來越差勁嘅。如果連大教館都步此後塵嘅話、恐怕唔使幾耐就被世界遺棄架喇！嗚呼哀哉！