放生咒

天靈靈呀地靈靈

茅山師傅眼矎矎
眈天望地無料到
盼望街坊莫詐型
 

繼涉嫌收受外來資助、以及策動「和尚打傘」嘅四名教頭（蚊蚊陳、民調耀、戰中廷、文學量）被大教館長老會放生之外、昨日青天衙門又宣佈放生一群路霸。據說青天大老爺接受被控一方嘅理由、認同刑部並無按照規定於兩週內向青天衙門就「路霸藐視法令」一案提出控訴、所以將利益歸於被告、並宣布不受理該案。

事緣在去年「和尚打傘」期間、青天大老爺曾經簽發清場命令、勒令路霸不得再封街鎖路、並立刻還路於民。期間老狀涼茶杰公然慫恿路霸無須理會該法令和繼續留底、並聲稱只要事後一齊到巡捕房投案就冇有錯。涼茶杰那番話出街之後便在社會上引發起相當大的回響、當中有人直指他身為老狀公然鼓吹藐視法令乃係不負責任和無恥嘅行為。事隔將近一年、青天衙門忽然宣布接受被告一方建議、取消對該案件嘅審判、理由就係控方在檢控期間程序上出現嚴重錯誤。今次涼茶杰都可謂沉冤得雪、證明他並無老點街坊、因為事實已經證明真係乜事都冇吖嘛！

 

今次路霸聞得青天衙門不受理此案難免要牙察一番、事關自己的確係視法令為浮雲、但結果居然連毛都無須賠上一條吖嘛！奇怪嘅就係、刑部總管強臂猿大人話今次件事之所以搞成咁、係被飛來橫疾所造成。他解釋、由於他忽然患上突發性失憶症、所以才記漏咗呢單畸屎。但係令人質疑嘅就係、難道刑部衙門所有人都同時患上突發性失憶症乎？更加出奇嘅就係、涼茶杰彷彿一早就知到強臂猿必定會染上奇疾而令到案不成案。難道真的如坊間流傳嘅一樣、涼茶杰係有未卜先知嘅超能力嘅？如果唔係嘅話、真係好難解釋得到點解佢會有咁大把握去喊人家嘅仔女以身試法矣！