寶島開綠燈

弱勢藍燈籠

馬哥坐華容

英子逢甘露

刺姊嘆技窮

明年寶島大莊家寶座花落誰家大概可以預見、傳聞指就算綠幫嘅大家姐菜英子瞓著覺都會被捧上下一屆寶島大莊家寶座。因為目前代表藍幫出戰嘅刺繡洪猶如越級挑戰、而且一直被菜英子遠遠拋離。最弊傢伙嘅就係、逢選必輸嘅親幫大佬送貨瑜還要跑出來搶剌繡洪嘅票吖嘛。咁你話啦、菜英子點會輸？難怪花旗大佬奧黑馬早就喊菜英子過府密斟、要求她答應在當上大莊家之後就要聽佢支笛、以及骾曬押在花旗倉底嘅一大批爛銅爛鐵、仲要大開中門讓金山肥牛在寶島牛肉市場大展鴻圖啦！

究竟藍幫點解會淪落到後繼無人嘅田地呢？從表面睇、似乎是藍幫自己玩死自己。首先是九影馬在揸莊期間嘅表現不但只乏善足陳、在地區選舉之中又慘遭滑鐵盧、連傳統重鎮「島北」嘅揸拂權都被無幫派嘅何教授手奪走。其次是立規院坐館亡金平在前年轟動寶島嘅「關說」事件之中被揭發利用職權妨礙司法公正、而遭大莊家九影馬追殺、結果亡金平卻連頭髮都未甩過一條、但九影馬就被幫中眾長老（包括前幫主連環箭在內）指責為誅滅異己而不惜大開殺戒。自此之後、藍幫聲名便開始江河日下。從九影馬最近狠批連環箭不顧幫中兄弟反對、堅持北上出席阿爺搞嘅打倒法西斯七十周年慶典一事看來、藍幫內訌相當嚴重。因此現任幫主豬柳倫自稱領導能力不足而拒絕參與下屆大莊家競逐、改由一向低調嘅女將刺繡洪以大冷門姿態出戰、在把握上而言難免又再多扣幾分。另一方面、寶島嘅民調亦顯示、年輕一輩主流傾向支持綠幫、那就難怪連環箭早前寧冒天下之大不韙、急急上京見阿爺預謀後路矣！