由噓國歌講起

一噓訴心聲

剌激腦神經

不怕前無路

獨怕後追兵

 

日前城中一群球迷在一場國際足球賽事之中、拉開一條寫着「我哋係金紫荊」嘅橫額、並且集體噓國歌和掟物件、結果被當值監場人員寫入報告內、並引起世界足聯（世聯）關注。據說世聯可能會判罰下一場比賽齋踢、即係禁止球迷入場觀看咁解。人們只把眼光集中於世聯是否會這樣做、而忽略咗噓國歌球迷嘅動機。以當時情況看來、是一群有心人利用國際賽事這個平台去宣示自己嘅政治立場。相信無論是判罰齋踢、抑或係取消本城舉辦賽事嘅資格、對他們來說都是無關宏旨的。因為他們旨在宣傳「講獨」吖嘛！

雖然噓國歌球迷被視為講獨主義者、但講獨這種思維係唔會無端端走出來的。基本上、若不是內地與紫城兩地嘅價值觀存在著嚴重分歧、若不是雙方都有人急着要把自己嘅一套價值觀向對方硬銷嘅話、相信社會上就唔會有咁多矛盾。矛盾就是爭鬥、有爭鬥嘅地方就會有極端主義嘅出現。紫荊城當然唔會例外、講獨亦就是這樣應運而生。相信人們都心裡明白、紫荊城根本上係不具備獨立條件的。因此講吓則冇所謂、但來真的就必死無疑。也許你可以不承認、但事實擺在眼前、假如紫荊城失去天朝支持嘅話、就等同失去了生存空間。講到被同化呢個問題、更加係無可避免的。試問世界上有那一個政權、能夠包容一個與國家所奉行嘅政治制度格格不入嘅城市？據我所知、即使係世界民主老大山姆大叔都辦唔到。你有否想過、點解當年朝廷只提出讓紫荊城五十年不變、而唔係五百年、亦唔係五千年呢？當五十年過去後、紫荊城又會係點樣嘅光景呢？看來、畫公仔無須畫出腸啦！係嘛？因此人們硬着要以卵擊石只會帶來災難、只有從妥協之中找到出路才是王道。在下所講嘅妥協並不是針對廷朝而言、而係針對紫荊人自己來講。因為與朝廷硬碰硬、由始至終都唔係紫荊人嘅主流意願吖嘛！明白未？！