一數兩計

一條大數兩份計

發達不成勿閉翳

向來官商同一脈

九折出門十三歸

有商界代表指出、今年十一黃金周假期生意淡薄乃係趕客黨所關照嘅、並要求縣府重啟「一天多行」政策。然而商發局主管卡啦蘇話、根據入城署在假期首日錄得嘅訪客入境數字、比去年同期高出一成半。言下之意大概係、他已達成旺丁指標、能不能旺財則責不在他。點不知話口未完、卡啦蘇就被人質疑佢死人燈籠報大數。現在問題是、究竟係卡啦蘇作大、抑或係有人借題發揮迫使縣府恢復「一天多行」政策、好讓他們繼續發水貨財呢？

坦白講、在下絕不相信卡啦蘇膽敢公然報大數、因為事實證明、凡屬「問紮官員」者、誰講大話誰就冇好下場。平心而論、把生意淡薄嘅責任推到趕客黨身上是有偏概全之嫌、難道奸商嘅經營手法就無關係嗎？依我睇、今次生意淡薄是跟內地海關近日加強打擊水貨客脫不了關系。事實上、缺少咗水貨客那股「搶購熱潮」帶動、再加上真正觀光客所持嘅消費態度比較謹慎、商戶嘅生意額是冇可能跟水貨大賣時期相比。眾所周知、目前內地經濟已經開始放緩、到來消費嘅內地人自然會睇餸食飯、若想縣首恢復「一天多行」嘅話、辦法唔係冇、不過想夾硬嚟就一定唔得。主要原因係、水客問題已經演化成激發兩地民間矛盾嘅禍首、所以阿爺絕不會坐視。坦白講、從前靠打小報告迫使縣首「腳痛歸田」嘅事可一不可再、除非當今縣首犯了嚴重錯誤、破壞朝廷嘅維穩政策、從而扯起阿爺把火則另計。但以當今縣首這號步步為營嘅人物看來、冇咁容易被西爪皮跣低嘅。依我睇、「一天多行」能否重啟、又或是在何時重啟、是由須求者「在來屆小圈子擂台大賽之中、壓注在那一邊」來決定的。既然係咁、就無謂呱呱咯。不如先坐低、飲杯茶、食個包、然後再慢慢斟掂條數啦！