兜巴扯面

明打既不得

暗鬥易迷塞

先天無能士

代代喊冤屈

被放逐嘅四口老大近日又口擘擘潤起施威來。佢話唔知到講馬辦和西環辦有冇向大教館長老會施壓、阻止提升蚊蚊教頭做副總教頭、但係佢就批評長老會堅持要等埋首席副總教頭一齊才推選嘅理據、比起當日亂制派在甩轆事件之中堅持等埋八叔才舉手嘅理據更加荒謬、並直指施威做得太過「適度有違」喎！嘩、四口老大咁講嘢、咪即係以贈施威為名、請阿爺吃兜巴扯麵為實？喂喂、呢碗麵會唔會食出禍嚟架？閣下執著成咁、小心累親則邊嘅人至好呀！

其實在亂制派裡面、又何止四口老大要請施威食兜巴扯麵？早前猜啦斌、大龜林、掙六成、飯大姑等人都輪流請咗施威食唔同份量嘅兜巴扯面、只不過施威早已食到麻木晒、以致冇乜反應之嘛！掙六成為咗細佬掙七成被釘牌一事而鬧情緒、並每隔一兩天就整碗兜巴扯麵畀施威嘆。幸好掙六成嘅師爸吳校長及時阻止、否則下一個被放逐嘅人可能係佢都未定。由此可見、江湖上流傳施威只得阿爺一個朋友嘅講法、未必係冇根據嘅。傳聞顯示、雖然「豬狼鬥」已成過去、但兩大陣營之間嘅情意結依然解不開、雙方嘅明爭暗鬥從未停止過。唯獨是礙於阿爺嘅關係、不可明攻、惟能暗打之麻！被放逐嘅四口老大當然吞唔落那口冤氣、一有機會路就請施威食兜巴扯麵。然而、施威亦自知、但凡有關佢嘅嘢都唔會有句好話、所以自封雙耳懶聽外間一切批評。施威之所以如此淡定、係因為他十分清楚、越係多人想佢摺埋、阿爺就越撐佢。誰敢不服氣、誰就冇得留低。依此看來、只要施威一天在位、亂制嘅兜巴扯麵仍會陸續有來。