暗戰

看似勢洶不是洶

紅家本來路暢通
爾推洪水將吾淹
我必趕你入胡同
 
江潮傳聞顯示、近日上開幫在祖家股票市場興風作浪、一為搶錢、二為搗亂阿爺檔攤。但據圈內人指出、從表面看外資在祖家股票市場所佔比例甚低、是無能力打亂整個股票市場、但如果有內應幫助之下、環境就絕對不同。據說在自從兩週前開始、上開幫人馬跑到阿爺開設嘅紅股賭坊、並在沙蟹賭桌上挑戰阿爺。由於上開幫是有備而來、一開始便鋪鋪晒冷把阿爺殺個措手不及、以致賭坊嘅銀両如倒水般的倒入挑戰者嘅口袋裡去。由於坊間有謠言指阿爺可能會輸掉紅股賭坊、以致賭坊股票持有人急速沽貨。再加上番邦大鱷在這場豪賭之中搭上開幫嘅順風車、使得紅股賭坊嘅形勢變得更加嚴峻。

金紫荊股市亦不能置身在這場中股風暴之外、由於有人急於套取現金返祖家補倉而瘋狂沽貨、令到本地股市爆發波動。由此可見、祖家資金在本城股市所佔嘅比例絕對係唔少嘢。幸好當阿爺心神稍定之後、一方面吩咐大賬房放水救市、另一方面下了一道「只許揸、不准沽」嘅命令、兩地股市才稍為穩定下來。現在問題是、究竟這一回又是甚麼名堂嘅玩意？據說、阿爺揸拂以來頻頻洗太平地、以致同門終日左閃右避、已經有唔少同門踩中洗地梘精撻到攤攤腰、有些撻至終身殘廢、甚至有部份人撻到一命嗚呼。但係同門嘗試過用不同方法都不能迫使阿爺停止清洗門戶、於是有人想到由上開幫跟阿爺賭沙蟹、如果能夠令阿爺輸掉紅股賭坊嘅話、他就無拂可揸、到時大家都無須慌失失度日。但可惜阿爺實在太有財勢、上開幫又再多輸一仗。雖則如此、但戲還會繼續演下去、新的情節很快又會出現在看官眼前。大家不妨拭目以待吧！