劣戲一齣

賊過後興兵

分明係搵丁

鬧極無新意

見者眼矎矎

俗語有講、怪事年年有、今年特別多。在人民公社上演嘅「三司會審皮佬禮」鬧劇裡面、替疑犯辯護嘅狀師竟然係案中被指收受利益機構嘅話事人藥媚。劇中商人皮佬禮被指控、去年將一批價值六百萬両白銀嘅金山特產花旗柑送給大撞幫、作為該幫力撐「和尚打傘」嘅謝禮。之不過、身為大撞幫話事人嘅藥媚、居然無視瓜田李下當起皮佬禮嘅狀師來。據藥媚解釋、被指收受花旗柑只係大撞幫又唔係佢本人、所以佢嘅身份並不存在利益衝突問題。呢嗱、三司呢頭指責藥媚嘅解釋唔知係乜嘢標準、嗰頭又接受佢嘅解釋、並容許佢繼續當皮佬禮嘅辯護狀師。你話嘞、咁仲唔係劣戲、唔通係好戲咩？

講到標準呢家嘢、在今日嘅公社裡面乃係人皆有之。其實在這個道理不在人心、公義全仗實力嘅世界裡面、誰的拳頭夠硬、誰定下的就是標準、而且標準是隨時隨地都可以更改的。你不能視之為雙重標準、因為這是多重標準、而且係強者專有權利、弱者只能服從。不過無論點睇、莫講話係區區藥媚、即使係泛盟都唔見得係強者。他們之所以能夠為所欲為、全憑背後有個拳頭大過沙煲嘅大佬照住。你可以話藥媚係狐假虎威、但別忘記如果隻老虎唔夠惡嘅話、就唔會連阿爺都要賣佢怕啦！係嘛？因此、別妄想這趟審訊會有突破、在痛腳互捉之下、極其量亦只是高高舉起、輕輕放下而矣！咪被我睇死、到頭來公社啥也查不出來、只能交代一句「遺憾」便落幕散場。注於皮佬禮和分柑五人組、相信連頭毛都不會失一條。

坦白講、如果有心要對付那些涉嫌行為不當嘅公職人員、應該告上清天衙門由法律加以制裁。試問使乜自己粉墨登場、扮鬼扮怪咁辛苦呢、吓？