世事如棋

你說我奸不是奸

吃罷終歸要埋單
錯在頻頻失預算
關門隱事也艱難

呢嗱、我在前兩編文章剛提到衙之中有幾隻水蟹沙嫌騙取病假、並跑到佔領區當皮佬禮保鏢而縣太爺卻毫無反應、話口未完昨日衙門在毫無先兆之下宣布解除統戰廳廳長掙七成、以及組織廳廳長戥你威兩人嘅職務。據路邊社社論顯示、以其炒一不如炒二。因為獨炒老戥嘅話、反對派必然會大造文章指責衙門迫害忠良、但連同穿紅褲子嘅七成大叔一起炒就可以塞住悠悠眾口。更妙嘅就係兩位廳長均表示、係自己炒自己魷魚嘅。話時話、掙七成年近古稀須要退隱尚講得通、但戥你威尚未到花甲都話要退隱就有點牽強。佢哋咁講法、唔知你又信幾多成呢？

坊間盛傳掙七成去官是被那場驚天動地嘅「和尚打傘」運動所累、原因是他這個統戰廳主管實在做得不稱職。其次就係戥你威連公人加薪都搞到拖泥帶水、呢個組織主管都可謂正式係水過水兵、所以非炒不可。但京城流傳掙七成當統戰廳主管以來處事手法一向都是獨行獨斷、由其是對於前朝遺臣更加不信任、加上其作風與衙門文化格格不入、所以若不是收錯情報、就是交白卷、朝廷對此甚為不滿、所以食豉辣炒魷係遲早嘅事。注於戥你威被指因管理不善而被炒、亦非無的放矢。據說他在「和尚打傘」一役裡面、眼巴巴的看着自己屬下在衙門內宣揚「黃孭帶」不在話下、更惹爭議嘅就係有下屬公然違反公人手則、在工傷病假期間不在家中養傷、而跑到佔領區當皮佬禮保鏢、仲上演武松打虎將襲擊者壓倒地上、然後騎在其背上耀武揚威、但係事後那名公人居並未受到對等嘅紀律處分。再加上有人告密、指老戥打麻雀時經常放水畀縣太爺嘅對頭人、累到他唔係包九章就係包十二章都唔在講、最嬲嘅就係連阿爺都頻頻被人截餬吖嘛！試問咁嘅倒米壽星仲點可以留低？所以話啫、當今嘅阿爺認真唔係人咁品架、絕不容許有人食碗面反碗底、假如縣太爺再姑息嘅話、分分鐘自身難保。如果冇估錯嘅話、下一位食豉辣炒魷嘅官將會比今次的官更大。信不信由你。