阿蜂原來係猛人

你猛我仲猛

無端起勢賺

若覺不自然

全因你未慣

語所謂「人怕出名、豬怕肥」吖嘛、之不過呢句嘢只係適用於一般正常人身上、睇怕對於面無四兩肉嘅痴蜂哥來講就冇有怕至係。某日當痴蜂哥一覺醒來連眼屎都未抹乾淨、就忽然發現自己無端端成為世界級領袖、而且自己個大名還可以跟天朝萬歲爺、大教王等名人共列一榜、都可謂光宗耀祖矣！難怪痴蜂哥近日笑到機乎連個下爬都跌埋落地咁滯啦！認真恭喜晒喎！

正當萬歲爺與天下英雄舉杯慶祝「亞頭行」成立之際、山姆大叔居然吩咐「除褲雜誌」製造一個全球最top嘅50猛人表出來、並將痴蜂嘅大名排在第十位。唔使問阿貴都知到佢要在「二佔」之前先為痴蜂打支強心針、好教他更加落力翻轉紫荊城、從而分散萬歲爺在南海注意力、好讓他獲得更多空閒去離間東盟跟萬歲爺嘅關係。之但係痴蜂唔係咁諗、佢只覺得過引到不得了、事關與他並列頭10名嘅人物、居然係平果總裁、勾洲央行總裁、天朝萬歲爹、大教王、天竺總理等猛人、更抵死嘅就係那些如英鱗銀行行長、利比利罅總統、飛時卜始祖、肶爾蓋茲等四十人更加要排在自己之後、跟蜂尾聞蜂屁吖嘛！所以話啫、山姆大叔呢份人專門在人家擺喜酒嘅時候就拿個馬桶出來當眾開大。咁搞法、係人都怕咗佢啦啦！係冇？

計我話、既然山姆大叔咁睇好痴蜂、不如出資叫紫大教館嘅民調大教頭造盤靚數出來、捧痴蜂為本地最得民心嘅top青、然後推舉他做本城揸拂人、到時成個紫荊城就變咗係山姆家嘅殖民地吖嘛！係冇？！