星君仔的啟示

有個細路玩百厭

遭人勸阻父黑臉

少時做慣霸王雞

長大橫蠻兼氣焰

日前我與友人在快餐店吃早餐時、見到隔行斜對面的卡位坐着一對年輕夫婦、而他們後面卡位就坐着一個中年男子和兩名大約三和五歲嘅小孩。其間那名年約五歲嘅小孩不斷在其坐位擒上擒落、將枱當凳坐、將凳當地踩、最後居然精彩到擒上卡位椅背頂部當馬咁騎、搞到隔離卡位那對年輕夫婦周身唔自在、但係那名小孩老爸卻毫無勸阻自己個仔嘅意思。直至到那位年輕男子被小孩嘅鞋底兜頭兜腦招呼咗一下之後、就忍不住轉過頭向那孩子的老爸講：“唔該你睇吓個仔啦、佢咁玩好危險架！”點不知那位老爸居然對個仔講：“快啲返落嚟、有啲人好憎細路仔架、落嚟啦、唔好被人話我呀、知唔知到呀？”在下當時心想、咁都得？

呢嗱、俗語有講、大不好時教壞細。當今有些人眼中只有自己而無他人、幼少時是父母養而不教千依百順。當孩子長大後人倘未有能力對社會作出貢獻、就先攤大手板、爭取這個、爭取那個、彷彿整個世界都虧欠了他們甚麼似的。誰膽敢擋在他們面前、誰就是敵人、甚至連爸媽也不例外。有些人為達成一己之欲、居然厚着面皮指黑為白、甚至推人家子女去為他們墊屍底。身為師長嘅人、不獨只沒有好好的去教導學生如何推己及人、反而鼓勵他們去以身試法、甚至教唆自己嘅學生公然違抗法院頒布嘅禁制令、還說只要事後去自首就不算不守法。請大家試想一想、假如有人擁抱着這種思維不斷去作惡嘅話、我們的社會那裡還有安全可言？所謂種瓜得瓜、種豆得豆、有這麼樣的一代、就有這麼樣的下一代。難道我們的社會就此沈倫下去？