四叔有好橋

愚人用高壓

能者自振刷

擅用好時機

無須出蠱惑

噚日在大牌檔嘆奶茶之際、忽然聽到隔離枱錢老二起勢咁對人呻、機乎連大榕樹嘅葉都被佢呻埋落嚟。佢話「自己行」是朝廷送給紫荊城嘅大禮、點知現在被打水幫班反斗星搞到佢檔故衣無人問津、認真害時出世。佢仲話會向紫府提出盡快將櫳底嗰劑「廿三味」拎出來煲畀班打水仔嘆、睇吓佢哋仲有冇得惡喎！嘩！錢老二呀、錢老二、你使唔使咁大整蠱呀？須知到煲「廿三味」唔係講玩架、更加唔應該用來作為生意人護航嘅工具、千祈咪打錯算盤呀！

呢嗱、一日都係紫府講嘅邊疆賺物城、講到今日依然十劃都冇一撇、咁又好難怪人嬲嘅。之不過、講到解決問題呢家嘢、點都係老薑至夠辣嘅。素有紫荊鼓王之稱嘅四叔就係其中表表者嘞。今日有報導指出、他老人家已經坐言起行、設立一個非謀利嘅購物城基金、並且取得新記嘅合作、以象徵式一元租金將旗下一幅面積四十二萬平方尺土地租給基金、用作興建成一個臨時邊疆購物城。據說四叔是從米字國所辦的貨櫃購物城獲得靈感、將大量貨櫃拼湊為店鋪出租。據稱鋪位租金大約是每一平方尺為六十至八十元不等。當基金扣除一切必須開支之後、就把所有盈餘撥歸公益用途。嘩、呢啲咪就係皆大歡喜囉！咁、你話嘞、四叔呢個計劃係咪直得鼓掌？喂喂、聽講話、購物城將會趕在今年十一黃金周前開張、如果唔想勢輪嘅話、就拿拿聲去敲門問價、順便睇睇邊個鋪位風水最靚、然後就提早落訂、到時就肯定豬籠入水加嘞。所以話啫、只要冷靜啲去想想就有好計、無須吓吓都要拉刀拔劍咁激啫！係嘛？