選戰演義 之 笨策

你說佢笨不是笨

阿叔向來最穩陣

唯獨校方無上策

贏得比賽輸甩運

紫荊學校小四丁班選舉班長提名已經截止、薯仔華、烏大官、林亞井三人獲得足夠提名要順利入閘、唯獨是只有葉小柳在截止前一天尚未取得足夠提名。唔知到林亞井係太過心急、抑或係想贈㷫。居然公開放話、假如葉小柳真係入閘不成、就會馬上向她界紹自己嘅心得、希望獲得她支持喎！嗱、其實無須林亞井打開口牌、葉小柳落敗之後絕不敢不支持她的。因為葉小柳知到、因一時之氣得罪校長、係唔止輸比賽、還會輸掉未來。林亞井被烏大官公開唱佢唔掂、就嬲到反唇相向、喝人家收嗲。現在她見葉小柳形勢不妙、就講埋啲咁哽耳嘅話去刺激人家嘅腦神經。咁樣做、分明畀個氹人踩啫！

呢嗱、舊生會元老登陸成聽咗林亞井嘅講話都頂佢唔順、於是跳出來再尚未提名嘅兩百多名選委呼籲支持葉小柳入閘。雖然呢啲都只不過係做戲咁做嘅假動作、但登陸成總算係講人話吖嘛！其實在這次提名戰裡面見識到人性醜惡嘅一面。雖則話、今次嘅選舉係小圈子架忌冷玩晒、但選出來嘅班長就關每一位同學嘅事。之不過、提名過情卻令人睇到眼都眅埋、首先就係校方派遣訓導主任雙失江向乖仔派同學施壓、指明要提名某位參賽者、繼而又派遣班主任雙料明和校董統戰華出口術、話明就算某參賽者選贏、校方都不會承認其資格。另外校方又利用學生周刊發表論文、指某某表面上親校方嘅參賽者、其實係反斗派混入來嘅無間道。咁嘅格局仲算係乜嘢選舉？呢趟選舉給與同學們嘅印象、似係做大戲多過似選班長。你話唔係咩？善於玩法術嘅同學可以入閘、成日打錯算盤嘅同學也可以入閘、甚至毫無準備嘅同學都可以入閘、而反準備充足那位同學就只能望閘輕嘆。難怪三叔公都話、經此一役之後、校園嘅反對小圈子選舉呼聲必定會壯大起來。即使反斗派今次輸掉比賽、但卻贏得更多人氣。相反、乖仔派卻落得內訌加劇。因此、結果恐怕係河蟹打贏和諧矣！