假人氣 真欽點

咱家擂台廢事多

虛拳偽腳所為何

街坊嘆謂唔知埞

朝晚不停鬧囉唆

在小圈子擂台爭霸戰提名期間、總舵擺出前所未有嘅強硬姿態去催谷參賽者冧井、並在坊間引起陣陣「紅家會籠裡雞作反」嘅疑雲。當提名完畢之後、反派宣布全力支持獲得最多街坊擁護嘅抓錢華。在下唔知到當抓錢華聞得此消息之後會唔會開心到震、但相信烏大官聞此噩耗之後肯定唔慌會好受。記得在上屆垃圾會散班前最後一次會議之中、反派嘅涼茶杰和近身桃等人互掹貓尾、暗示會幫助抓錢華取得紫荊分舵香主之位。從那一刻開始、反派喉舌便開始將歷史上最廢財神重新打造成為最佳香主人選、並利用架忌冷搞嘅民調造起其人氣。在戰中主腦大妖蜓策動之下、推出一套甚麼「三百豭」造王計劃來硬砍亂制派。總舵方面亦罕有地硬來硬往、使一招大石迮死蟹、在眾目睽睽之下打開口牌、指明勝出者非冧井不要。

反派趁着紅家會仁大堂和聽協堂辦喜事之際作出上述宣布、除咗贈“㷫”之外、就是要讓亂制派裡面嘅反狼陣營能及早造好打算。眾所周知、兩堂開派對是紅家會盛事、總舵主例必率領眾當家一起出席。作為仁大堂大頭領嘅雙失江、以及聽協堂大頭領餘慶星都會準備好所有帳目讓總舵主審查。從總舵主平近男被紅家會奉為當代領導核心一事看來、他的老大地位穩如泰山、傳聞中嘅所謂紅家會內部權力鬥爭已經終結。由此推斷、雙失江早前南下冧鎮所講嘅話並不是代表鋼閘民、而係總舵主平近男嘅意思。換言之、抓錢華是總舵主心儀中人只屬謠言、總舵主不反對由冧井去接任下屆香主之位才是真的。照咁睇嚟、如果抓錢華真的勝出、極可能會爆發拒絕委任嘅風波、亦即係話、紫荊分舵嘅反狼派正式跟總舵主擘面了！假若事情發展到這個地步、對於本地投家來說肯定是大災難。因此挾民主而令總舵只能夠係一個唔見得光嘅策略、絕對不能擺上枱面當牌咁打出來。以今次總舵嘅處事手法看來、在這場擂台決戰嘅背後跟總舵主拗手瓜嘅人並不是傳聞中的鋼閘民、而係另有其人。可惜在江湖上缺乏這方面的消息、故無從評論而矣！