2017年3月15日星期三

天師亦冇符


你知我又知
靠天師
不怕毒穿腸
最忌冇得醫

不久之前繩大教館門生會為㒼族幫召開講獨宣傳大會。㒼族幫代表兜酷龜入場後便宣布為撞毒默哀、繼而聲稱紫荊分舵必須脫離紅家會、並主張要引蕃兵入關、以防紅家會發難。嗱、本來獨派要跟紅家會死過係唔關紫荊人嘅事。之但係、講到話分舵獨立兼引蕃兵入城、就關所有紫荊人嘅事。在下唔知到班獨仔獨女憑乜嘢去搞講獨、但很清楚佢哋冇權改變紫荊人嘅命運。坦白講、獨派要砍頭埋牆、抑或要引火自焚也好、總之焫到紫荊人身上就唔啱。君不見一眾戰中搞手至今依然逍遙法外、而且變本加厲的在“驅異會擂台爭奪戰、垃圾會擂台爭奪戰、以及今次嘅香主擂台爭霸戰”三項選舉之中指手劃腳。如果我係獨仔獨女都會冇有怕、趁勢大鬧一番、以之贈㷫啦!咁樣搞法、難怪連班街坊都認為分舵內好猛鬼啦!

有人問、點解紫荊分舵會淪落到邪道橫行、妖氣沖天?其實答案好簡單、那就是分舵領導層見到有人違反法規、知而不捕、捕而不控、控而不入、入而不罰、甚至喺度揼鐘、以致一眾蛇蟲鼠蟻、蠄蟧曱甴肆無忌憚的在城中胡作非為、搞到社會秩序失去平衡。本屆揸拂團只剩下三個多月就散班、但一眾黃暴頭目依然未被帶上刑堂受審、而戒律堂興保安堂仍然在這件事情上互相推莊、大有推到夠鐘散班就關人個屁事之勢。試問放縱到咁嘅地步、一眾妖孽又點會話唔越來越大膽呢?仲有呀、總舵方面又痕又怕痛、既管唔搞細圈裡面班籠裡雞、又奈班牆頭草唔何、更加係趕唔走長期在雞籠外徘徊的那隻花奇鷹、以致分舵地頭反紅山頭臨立、空有大歸之名、卻無大歸之實。雖然經常有人死雞撐飯蓋、聲稱「一大兩細、綁人自綁」係幾咁成功、但在下卻感覺唔到囉!之但係、對於那些蛇蟲鼠蟻蠢蠢欲動嘅感覺就非常強烈。我睇呢個形勢、恐怕再過多十年都係改唔嚟喇!


12 則留言:

  1. 話咁快又一天🌟週四╠╣aΡpy✨
    好友♦・゚☁晚安呢🌜甜夢安睡🌛💤
     O
       o
     .∧_∧・。◇
     ( ・ω・ )
     |⊃/(___°¨*★
    /└-(____/✬・゚☆
    ✾๑۩۞۩*ღೋஜഐ❉

    回覆刪除
  2. 正如域兄你講,咁搞法再多十年都只會更亂,原因係,其它地方貧富差距沒那麼大……

    回覆刪除
    回覆
    1. 更多嘅就係花大叔容不得紅家會日益壯大、所以必定要不停的替總舵添煩添亂、而舵地大佬們又兩邊都惹唔起、惟有台面做人、台不做鬼矣!

      刪除
  3. 計我話,港獨根本無巿場,亦不成氣候。佢哋只不過喺處嘩眾取寵,吸引大眾注意力啫,我覺得啋呢班友仔都嘥我時間!

    回覆刪除
    回覆
    1. 講獨當然係得個講字、最主要原因係“獨”對任何一方利益集團都無利可圖。但這幫人是有人供養的、因為總有一天有用武價值吖嘛!

      刪除
  4. 『獨仔獨女憑乜嘢去搞講獨』
    冇乜成本,有得發洩,自覺威威,又有傻仔傻女在台下捧場。
    而家有反盟和花奇鷹製造嘅咁好環境唔攪,仲等幾時?

    回覆刪除
    回覆
    1. 獨派、反派、亂制派、紅家會、花家幫通通都是「你中有我、我中有你」的、這種關系連刀也斬不斷、而且一切皆為利之所至。因此、那群政治盲流連自己做緊乜嘢都唔知到架!

      刪除