鬼打鬼

菩薩打公仔

越打越好睇

無事起風魂

有難暗啞抵

呢嗱、近日紫荊分舵香主狼鷹入稟刑堂控告鬼槍良誹謗、而鬼槍良卻反指狼鷹控告他、等同打壓垃圾堂嘅言論自由。點不知、另一位堂友射米進就企出來踢爆件事。佢解釋、由於A君是在堂外發表言論引至B君指控、所以不會對垃圾堂言論自由構成打壓。雖則係咁、但係那個未來香主候選人（過氣大法師）烏托卿就話、香主權高勢大、動輒就去控告啲小頭目、擺明係以大欺小喎！

喂喂、既然烏托卿係一位過氣大法師、就即係法術界嘅得道高人、理應曉得明辨是非至係吖嘛！點解佢居然會講埋啲咁違反法理嘅話嘅呢？如果由佢老哥來做分舵香主嘅話、係咪表示地位低微嘅人就可以隨便詆毀別人、地位高嘅人就算被人老屈都不得作出自衛反擊嘅呢？在下實在想唔通、呢位過氣大法師從前究竟係點樣施法去懲戒那些妖魔鬼怪嘅呢吓？！

開講都有話、先撩者賤、打死無怨。呢趟係鬼槍良在垃圾會會場外向老記爆狼鷹大鑊、點知好死唔死被對方抓到涉嫌捏造事實嘅把柄、先至會被人告上刑堂。無論誰是誰非、總之此事正如射米進話齋、是在會場以外地方發生、咁就即係跟公事無關啦！因此一切有關訴訟費用應該由原告和被告雙方自己扲荷包搞掂、千祈咪動用公帑至好呀！