搞手落鑊

世界冇公平

諸君莫詐型

坊間群鬼叫

信者更慘情

呢嗱、日前巡捕房正式向多名占亂搞手發出拘捕和起訴通知、並要求他們主動到巡捕房投案。消息一出街之後、本來自稱敢做敢承擔嘅反盟、有人飛身撲出來指責揸拂當局檢控佔亂頭目係政治打壓。但更多人認為、當局讓他們操控完三選（驅異堂選舉、垃圾堂選舉、小圈子選舉）之後才開始檢控、分明係大大關照就真。不過值得留意嘅就係、坊間陰謀論質疑、究竟大老爺今次會不會如上次放生佔亂三條𡃁一樣咁高舉老祖宗嘅「惡生無罪、鬧反有理」免死金牌、再來一次大放生呢？巡捕房又會不會在程序上出錯、或在舉證方面有偏差、以致利益盡歸被告呢？雖然這些都是吹水唔抹嘴之言、但呢個世界確係無奇不有、就讓我哋拭目以待吧！

上次大老爺判案時、指出黃衛兵三小將不是為個人恩怨而鬧事、佢哋係代表市民以政治抗爭手段去表示對揸拂當局不滿、故輕判做義工、甚至為着成就其中一人去蕃邦求學、讓其心口掛上緩刑兩個大字出外留學。就在那個時候開始、在下才恍然大悟、原來大老爺判案除咗以法理為基礎之外、仲可以攞政治來做依據嘅。咁就唔怪得班街坊聞判後媽聲四起啦！嗱嗱嗱、千祈唔好怪佢哋呀！因為佢哋同我一樣、都係乜都唔懂法律嘅大鄉里嚟架咋！我哋人人都相信公堂之上法律為大、所以個個都唔敢以身試法、勢估唔到原來政治係罪犯保護罩嚟嘅。難怪黃衛兵人人目無法紀、個個有恃無恐啦！其實、在每個人心裡面都有一把秤嘅、人家表面上不當一回事、並不等同真係冇事。紫荊城之所以搞到滿城怨氣、妖孽橫行、就係管治當局從來不當人心是一回事所至嘅。今次佔亂頭領被提堂、全城人都有機會認真咁去見識一吓、坐在「明鏡高縣」牌扁下嘅青天大老爺係幾咁公正嚴明架喇！