這個擂台太蠱惑

冒牌天師畫靈符

搞到眾生食詐餬

無奈人間多妖孽

齊天大聖嘆嗚呼

呢嗱、無論賭波或賭馬、押注前都要揀啱自己心水先吖嘛！之但係、賭擂台原來係冇呢支歌唱嘅。主辦單位為咗怕精通米家拳嘅薯佬打贏、就夾硬擺個同樣係精通米家拳嘅奶媽上台、仲話明非佢贏者總舵不要。咁你話、係咪鬼打後尾枕？其實今次四名參賽者都係由同前講櫻堂過檔而來的米家拳同門。由此可見、紫荊分舵取待講櫻堂立廿載、依然連一個龍家拳高手都培養不來。咁即係話、分舵每任香主、個個都係呃飯食嘅、係嘛？總舵方面、一味驚死反盟奪權。但以當前形勢看來、所有參賽者都係由前講櫻堂培植出嚟嘅人、當中有冇無間道、只有天曉得。難怪有街坊話、呢場比賽簡直係混吉架啦！

總舵既不支持薯佬、又差遣其喉舌唱衰佢係投向反盟嘅兩面人。喂喂、開講都有話、東家求不得、咪去求西家囉！咁有乜嘢唔啱啫？唔怪得有人要搬西廠大當頭雙料明和長老會副會頭統戰華出來、預先判薯佬輸啦！從今次反盟派出兩個拳手、細圈只派出一個嘅格局看來、薯佬和芋角必定會陷入鬼打鬼局面。試問咁又點可能打贏這場比賽？隨非反盟旨在利用今次打擂台嘅機會來做勢、為下一波大動作鋪路、否則冇理由擺個咁蝕底嘅局出來。其實反盟真係想贏嘅話、只須擺薯佬或竽角任何一個人上擂台便足夠、將剩餘提名票送給掃把姐、好讓她去分薄奶媽嘅注碼才是上上之策、但怪就怪在反盟卻反其道而行。雖然統戰華講過、總舵不會承認薯佬嘅資格、但冇講過連芋角都拒絕。睇嚟、除非薯佬是煙幕、而竽角才是真波、否則反盟和反狼團伙全無勝算。呢嗱、後日就是提名截止期限、據說至今尚有近兩百張細圈提名票去向未明、如果一吓唔覺意在最後關頭跌落地、被掃把姐執到嘅話、呢場賽果若不是出現“螳螂捕蟬、黃雀在後”嘅現象、就是出現“集體犯規、終成流打”嘅結果。依我睇、隨非某一方臨陣易帥、或者另一方有人臨陣退出比賽、否則賽果誰人也拿捏不準的。