常無參選？

話你唔聽佢又選

常無混吉眾嘴貶

雙失遠路來打氣

眾生猶似被催眠

呢嗱、泛㒼又籠裡雞作反喇！丐幫幫主常無毫不理會眾議堂堂主雙失江在冧鎮發放嘅（冧井是總舵唯一寵兒）言論、堅決要報名競逐下一屆香主寶座。另一邊廂嘅大撞幫頭目搏命哼話、雙失江言論令其反感、並強調姑勿論常無是否參選、無論冧井是否真命天子、都不會影響其投票意向。換言之、大撞幫只會落實其幫主涼茶杰在去年垃圾會散班前許下支持抓錢華嘅諾言、絕不會投票給無常呢位架忌冷。按照十數名眷制巨頭走出來為冧井站台、就可以看得出紅家會內部已經就由誰來當紫荊香主統一了口徑。事到如今、泛㒼應該知到就算將那三百二十多票全數扤畀抓錢華、亦屬枉然。

呢嗱、正當選舉新香主迫在眉睫之際、有人在江湖上發放總舵內部矛盾嘅消息、甚至預言在今年下半年召開嘅紅家會「烚狗大會」將會有數名當家下台。湊巧地、總舵今次派來爆響口嘅眾議堂堂主雙失江、就是在傳聞中將會下台嘅人物之一。消息來得這麼巧合、令人更加感覺得疑雲陣陣。但無論如何、今次雙失江之言、除咗可以舒緩選委嘅疑惑之外、還登時令到泛㒼既重心據點全失。莫講話造王嘅春秋大夢幻滅、甚至連玩流選嘅機會亦喪失埋。呢啲咪就係唔肯腳踏實地、只管專走精面嘅下場嚟囉！人家紅家會能夠在大事情上統一口徑、終於令到班蠱惑仔冇位可入、呢啲就係「一枝竹筷易折彎、一策竹筷欲折難」嘅道理喇！呢個故事教訓我哋、單靠嘩眾取寵手段或許可以討得一時便誼、但想再上一層樓則難過登天。依我睇、泛㒼還是腳踏實地、攞個心出來為選民做番一啲有實際效益嘅事、總比縱日走精面搏大霧來得更有意義啦！係嘛？！