法律公正不可動搖

人多梗有渣

條例多窿罅

寬緊判由人

何必發爛詐

擾攘兩年嘅七捕快打沙包（沙句超 - 細牛）一案已經有結果。九品大老爺判七名捕快毆打沙包罪名成立、並即時還押待判。撐捕快人士得知此消息後、便跑到公堂外舉牌抗議。除此之外、亦有個別名人在臉書狂插九官「九品芝麻官」放生黃絲、嚴打捕快。嗱、我唔係幫九品大老爺講好話、今次佢判案絕對是公正的。若然在證據確鑿之下都夾硬判罪名不成立、咁就真係公然枉法架喇！雖然話、那幾名捕快是見到自己班伙計被人用疑似尿液在高處兜頭兜腦潑落去、以致情緒上受到相當大剌激、才會做出如此不智之事。但這種濫用私刑嘅做法、是為法律所不容的。

話時話、坊間廣泛流傳、細牛用尿液淋捕快、而捕快又痛打他一頓、理應是拉平了！坦白講、這種言論同蠱惑仔所奉行嘅以暴易暴手段、直程係同出一轍。別忘記、今次以暴易暴嘅係一群接受過專業訓練嘅捕快、而唔係烏合之眾嘅蠱惑仔。難道街坊願意見到捕快可以隨便打人乎？年輕人也許不知到、但上咗年紀嘅人是知到、在五六十年代本城捕快係打人唔使本嘅。由其是當時嘅反飛組便衣捕快、更加係以“無事打三拳”見稱的。其實捕快只是執法者、當疑犯就範之後只能限制其行動自由、而不得以額外武力對待。細牛雖然唔抵同情、但佢亦為其所作所為做咗五個禮拜監躉。無論你認為判得輕定重、總之他已經受到了制裁。今次輪到非法毆打他的人接受法律制裁。呢啲叫作一件還一件、絕無半點含糊。這就是法律、無論對你、對我、甚至對所有人來說、都是人身安全嘅保障。在下實在看不出、人們有甚麼理由去撐捕快濫用私刑的。恕在下大膽講句、今日我哋嘅社會之所以會為兩條唔同顏色嘅爛鬼絲帶鬧得家不和友不睦、同啲唔相唔識嘅人鬥大聲、甚至動手動腳、原因就係盲撐而撐到連理性都失埋吖嘛！看來那些絲帶迷須要冷靜一吓、好好的去想一想、應唔應該繼續戇居落去了！