2017年2月24日星期五

報應不爽



此君有若鬼見愁
輕貧重富眾皆憂
終於惹下離天禍
未到監倉已白頭

當年、紅家會紫荊分舵首任香主統戰華被反盟迫下台之後、大總管啱曾便吹着口哨接任為新香主。啱曾在位七年、搞到紫荊分舵成個地頭怨氣沖天。他一上場便先玩死居樓、繼而玩殘公樓、除咗發盡乜乜霸權和各大小炒家之外、仲發咗將物業改裝為劏房嘅一群業主、而唯一受苦的就是基層大眾。啱曾假借發展醫療產業為名、大開中門歡迎大圈產婦入城妢免、唔止帶挈咗私家醫館賺大錢、還使得一眾公家醫護人員被人高薪撬走、令到公家醫館大鬧人手荒、而引發後來嘅連串醫療事故。由於大量雙非孕婦湧入與本地產婦爭床位和爭產房、已經令紫荊人扯火。再加上雙非仔與本地學童爭學位和爭褔利、令到本城與大圈兩地人民互相交惡。啱曾縱容大圈水客以螞蟻搬家式、在本城到處瘋狂收購奶粉和其它日常必須品、搞到貨源短缺而令物價飆升、以致本地人奶粉難求之餘、還要挨貴嘢。以上種種、只能說啱曾劫貧濟富、雖然犯眾憎、但卻奈佢唔何。

俗語有云“上得山多終遇虎”吖啦!啱曾亦唔例外。當他過大海在馬埠參加黑門宴時、一個唔覺意被記者拍下照片、並在報章上以大編幅報導。從此、啱曾享受富豪款待嘅事便暴露在陽光之下。經過清天堂一輪追查、終於將啱曾押上刑堂、結果“違犯家規”罪名成立、被判入大祠堂面壁二十個月。奇怪嘅就係、細圈之中沒有一人出面替佢求情、而求情者居然全部都是反盟嘅重量級人馬。由此可見、啱曾雖然曾經是細圈頂爺、但是他在細圈卻沒有朋友、而他的朋友都是來自反盟的。但問題係、反盟中人究竟係啱曾嘅朋友、抑或係盟友嚟呢?相信各位街坊已經心中有數矣!縱觀啱曾案、可以見佢係大豪寵兒、又係黑道貴賓、更加係反盟嘅患爛之交、唯獨是跟細圈中人貌合神離。試想想、這個畫面是何等諷刺?啱曾到咗古稀之年才受面壁之苦確實可悲。相信佢現在終於明白、其拜把兄弟詩人許當年入冊前嘅心情係點嘅咯!唔知今次佢哋兩兄弟在大祠堂相逢時、是否會有所悔悟呢?


29 則留言:

  1. 🌈好友⛅・゚☀我的早晨☕你的午安好☁*`🌞
    瞓醒真係好寒冷°¨°大家要著多件&帶雨傘呀
    ╔═════╗💙*¨*✾💚
    ║░═══░║❉¸。゚ഐ
    ╚═════╝╔═╩═╗💜
    ░══╬══░⊹╬╬¨`*💛
    ░░░║░░░⊹╚╬═💗⊹💘
    🏡🏠🌲💒週五╠╣aΡpy🌼🌹🌻

    回覆刪除
  2. 此君鬼見愁 輕貧重富憂
    終惹離天禍 未監已白頭

    回覆刪除
  3. 他點會後悔吖(佢好似發表過聲明話佢自己冇錯)…
    我諗佢唯一後悔嘅係:點解之前唔𢱑多的銀両和攞多啲著數!

    回覆刪除
    回覆
    1. 佢住私家房、食自選餐、待遇比佢拜把兄弟詩人許更好、當然唔會後悔。之但係、最怕就係被人再挖啲唔知乜嘢嘅嘢出來就唔係咁講喇!

      刪除
  4. Shu 兄,貪曾政績乏善可陳,拜富厭貧不止仲埋富豪黑底堆,貪坐遊艇私人飛機,前家廚同佢對薄官堂,爆話佢乜禮物都收連鹹蛋都收,唉貪過蠅頭小利大6貪官比佢陀衰哂。

    回覆刪除
    回覆
    1. Wai兄,其實貪曾會咁想,做官梗係要攞盡著數啦,否則仲做乜嘢官呀,而且佢更會賴今上的反貪,是完全的為了清除異己,是因,他不是今上所提拔的人而致遭殃呢!

      刪除
    2. 拜富只係為吃喝玩樂、起碼說服唔到街口補鞋佬三叔公囉!有啲人人都睇到、但係判頭卻睇唔到嘅糊塗賬、仲未搞清楚架!

      刪除
  5. 佢有今日,完全係自己一手造成,究由自取,唔值得同情!

    回覆刪除
    回覆
    1. 對呀、呢啲就係俗語講嘅「報應」嚟。

      刪除
  6. 在這一個功利主義的社會,學生讀書求分數、為搵銀謀出路。大多數全無國家觀念,甘為漢奸。
    啱曾私相授受,收受利益,人人向錢看。為民請命者,有幾多人真是為了民生,不是為了份高薪而賣力?
    若果繼續分裂、攪對抗,絕對不利。

    回覆刪除
    回覆
    1. 其實整個世界都係一樣、只係有啲嘢我哋睇得見、有啲嘢係我哋睇唔到。總之現代人已經唔再講甚麼儒家思想架喇!

      刪除
  7. 交友豈能不慎哉!EO 曾, 一生唯慬慎, 做咗財爺, 跟住做特首, 都係戰戰驚驚, 競競業業, 你話佢同富豪有交往唔啱, 老鬼有不同意見, 作為一地方或一國領導, 是否要各行各業各階層都有有所交流???

    富人工商企業, 都係人民, 只要是公開的, 透明的, 有何不可??? 官商交流同勾結是兩回事, 官商如不交流, 怎可發展, 這些年, 揸支筆, 攞住支咪的不斷吹水、噴霧, 向普通人鼓吹"另類塔利班, 又有"大把人"中了毒, 其實都係"憎人富貴嫌人貧"的小農DNA作怪作祟。

    EO曾臨退休, 怕咗人言可畏, 唔敢買樓, 亦唔敢係香港租樓, 要去深圳, 以佢嘅精仔本能, 以為可以避禍, 點知所靠、所托非人, 被"老友"跣佢一鑊, 咁樣坐得寃枉!

    呢鑊嘢,有留心時事,留心港聞, 都應該知道,據某些媒體揭料話, 佢係死在係"佢老友""乜乜針"手上,成件事都係佢"老友"果位吹水佬乜石斑,乜福水(呢条垃圾原名真係叫阿福)手上, 呢件大氣電波拉臣事情, 又據某些江湖傳聞, 搞出嚟,神又係佢,鬼又係佢, EO曾冇帶眼識人, 為咗幫佢搞大氣, 做啲嘢, 又信佢講, 同條土豪交往, 想退休在河之北,避咗香江, 以為呢條友真係佢条針,唔會俾陷阱, 點知唔知點解, 有未經証實的江湖傳説, 呢條針唔知為乜, 叫佢徒弟(家陣反咗面)報寸,而家EO仔後悔已晚!(以上屬於江湖吹水,講古咁講, "真嘅情形"應該冇咁小說同電視劇本, 唔應該信嘅, 咪當聽新聞佬劉夫子成日砌新聞咁咯!)

    結論係,交友真係要好小心!

    五十年辛勤拚博,
    一朝盡失世情惡
    帶眼識人嘆太遲,
    聰明算盡跌落鑊!

    回覆刪除
    回覆
    1. 交流並不等同勾結、這點非常重要的。

      刪除
  8. 香港某些人,成夠日話要法治,要司法獨立,要跟大英制度, 要公開公平公正,實際上完全唔係,又係中華小農DNA,成件案審訊都遠離上述以及普通法案例,最大令人費解,就係有被告,冇"原告",有疑是貪瀆者郤冇疑是"行賄者", 以大英普通法原則,即係港人口口聲聲的法律精神,已經違反,(大英審判,不理你是否"真實"犯案,是以法庭所呈示"無瑕疵"證據,否則"疑點"利益歸嫌疑犯,近日此二案"完全"反其道而行!!!!

    回覆刪除
    回覆
    1. 從黃藍鬥已經顯示得得清楚、本城人是輸打贏要的。

      刪除
  9. 申明,亦討厭曾某,亦認為他真有貪小便宜,香江到今淪落為黃色世情,遍港歪曲,佢責任至大, 取消中學歷史為必修課,罪大惡極,縱容黃色泛濫,白鴿亂飛,亦是他的"不撕裂"同"友好"政策有最大責任,國民教育又係佢屎忽搞出來,俾咗隻鑊三三四四九,乜香江人咁善忘?
    房價地產亂咗龍,又係佢搞出來,三三四四九盡力轉軚,竟然被某些物體死屈爛屈,所以老鬼並無替他求情之意,不過"核心價值"係唔係要"一視同人",陳大法官對倍審員的引導並不足夠,還有,為什麼不用母語去引導,不論法官或倍審員都係講廣東話,是否更清楚引導…?

    回覆刪除
    回覆
    1. 其實、除咗本城城揸拂人有責任之外、朝廷命令能否完整地下達到本城都有問題的。

      刪除
  10. 近年的香江民情,已經去到一片混亂,最可怕是標準亂七八糟,睇下成日出嚟噏嘢果位太學院訟法講師,龍間亂擺,一時一樣,亂引理論,唔怪得佢成世都係講師!
    法治,如今變了"法自",啱自己心水嘅,就話啱,淋人不明液體的是英雄,公民抗命!法不存他身上!
    嗱,老鬼冇話七条師兄啱,唔好掟帽,拍磚,定刑是否妥當才是點?亦是不少人質疑,該法例的定形不是只有二年半,而是從社會服務令起至刑可至十年以上,這次是引類似案例中的某種程度罪行曾判二年半,而這案例從何而來,是"官的自决",對與不對,無法指出,各人心中一把秤而已!
    不過,這五位師兄同埋大Sir真係怒發衝腦,錯!蠢!儍,又係今時今日社會現象,後生的,睇唔起老一套,以為自己飽讀乜書,唔肯向"老"的學習,要教訓呢条KT,好多方法,使唔使咁GG?

    回覆刪除
    回覆
    1. 當一個家庭裡面大多數執事者都是忤逆仔女嘅時候、大家長唔被氣死已經好彩架喇!仲有乜嘢啱唔啱好講?

      刪除
  11. 退休長棒都可觀,真係貪得冇謂!

    回覆刪除
  12. 相信佢最後悔嘅係貪得小家,以為貪D細眉細眼唔算貪,點知咁大獲,真係收入與風險不相稱。

    回覆刪除
    回覆
    1. 在下反而覺得未必、世界上總有些方法比起自己去貪更好的。

      刪除
  13. 域兄晚上好,
    曾先生冇話過要做個好官留名千古喎,一開始做凸手時都只係當打份工啫。以一個打工仔嚟講"我要做好呢份工"嘅標準係準時返工、準時放工。小做小錯、唔做冇錯嘛。以其老人家幾拾年浸淫於官塲,"推、側、閃、避、卸"呢五項絶學應運用得出神入化囉。

    你話我貪不是貪
    著數唔攞確唔啱
    只怨今時非往日
    臨尾都要去踎監

    回覆刪除
    回覆
    1. 華娃兄你好、
      佢確係話做好份工、而各大利益既得者都話佢好稱職架、而且仲出面替佢求情。但這並不等同是蟻民嘅睇法。

      雖然拉佢去踎監
      死人都撐自己啱
      這個孱頭有鬼用
      監倉於佢是龍潭



      刪除
  14. 佢又雙非, 又上上邊租屋退休, 都係佢本人已經加入統戰大事業了. 佢延續了統戰華的工作, 他今次被人告到入冊, 全因為佢陽奉陰為, 沒有全力支持統戰步伐, 令到統戰事業沒預期的快, 所以有力人仕要整整佢.

    回覆刪除
    回覆
    1. 據說佢有盡力執行統戰、不是只係為事頭婆而做、而不是為事頭公而做嘅喎!

      刪除