兩頭唔到岸

睇錯攤皮落錯注

天生殘視冇得醫

最弊兩頭不到岸

徒勞白幹陰功豬

呢嗱、自從白頭兜在公仔箱公開阿爺杯茶係「與講獨勢不兩立」之後、有心問鼎阿頭個位嘅人物似乎獲得明燈指路。就在剛剛之嘛、公家大賬房掌櫃抓錢華在垃圾會大舞台開腔之前、為了證明自己與講獨勢不兩立、便聲稱不會與已經被申覆嘅疑似講獨四人組（常無、重炎妖、羅三七、樓小蟻）對唱的。誰知他的聲明尚未講完就受到泛㒼尊貴集體炮轟、甚至連亂制都話佢唔啱。根據垃圾會法術顧間界定、在申覆未有定案之前、上術四人依然是垃圾會尊貴、是有權跟大掌櫃對唱的。這件事奇怪嘅地方就係、泛㒼已經公布委任抓錢華代他們去打「阿頭爭霸戰」擂台大決賽、但當他要飛起疑獨四人組時卻反遭群毆、更奇快嘅就係連亂制都喊佢認錯吖嘛！

從上術事件之中可見、抓錢華隨咗係五家八會嘅寵兒之外、唔止跟泛㒼無默契、與亂制亦冇偈傾。試問一個孤高成咁嘅人又點可能像其他凡夫俗子咁、去爭奪金紫荊話事人個位來坐？萬一被佢冷手執個熱箭堆打贏擂台嘅話、金紫荊話事權就會落在一個連自己想點都不大清楚嘅人手上。到時莫講阿爺唔知佢想點、即使紫荊人都唔知佢做緊乜嘢、咁就大件事咯！試問由一個沉醉於嘆貓屎咖啡、聽原音黑膠碟交響樂、睇讓子彈飛VCD、以及只懂唯命是從、不懂民間疾苦嘅人去當咱家話事人嘅話、豈非人都癲？如果係咁唔話、叫人緣更好嘅地窿唐返嚟做阿頭咪得囉、使乜搵抓錢華呀？嗱、唔係我要潑冷水、所謂天下熙熙皆為利來、不過金紫荊揸拂人這個咁顯滯嘅位由抓錢華這類虛無縹緲嘅高人來坐、簡直係坐即是不坐、不坐即是坐。如果一個唔小心䟕錯腳嘅話、分分鐘都會將自己弄得兩頭唔到岸、到時泛㒼甩佢轆、紅家會又唔認佢、咁就真係累起金紫荊架喇！如果佢真係為金紫荊利益着想嘅話、那就應該趁早執定個包袱、等到任期完滿兼收埋條尾數之後、便飛回楓葉國嘆世界好過。