西狗又闖禍

唔養唐狗養西狗

不曉看家睇門口

只會惹來千般錯

累得莊家猛𢲷頭

自從首任阿頭老古董收養咗一隻西狗開始、紫荊城就再沒有太平過。呢隻西狗到處亂闖亂撞、唔係倒瀉人家籮蟹、就係打瀉人家杯茶、最近還跑去惹怒泛㒼班政棍、搞到人家發動城中所有喉舌作全方位攻擊、呢鋪都可謂煩死人冇命賠咯！西狗在七年前冇有識死、無端端闖人八婆會館搞散三王阿姐台戲、結果累到當時嘅阿頭啱曾都要挨罵。殊不知近日居然闖入京城古物晒冷館、靜雞雞將人家嘅珍藏古玩運返紫荊城、累到負責拉狗帶嘅大總管冧井被泛㒼當箭靶、狂拮佢濫職。咁你話啦、呢隻西狗係咪養極都養唔熟嘅呢、吓？！

本來金紫荊古物晒冷館能夠擁有多幾件國寶級古玩晒出來向街坊炫耀一番、係一件有“飛屎”嘅事。但如果晒出嚟嘅係由鬼祟途徑得來之物、咁就嘅係咁講架喇！正如今次被人踢爆、那批古玩係有人在未取得街坊共識之前就秘密運入城一樣、搞到名不正、言不順、還有啥面子可談？難怪泛㒼政棍食住上、群起插之啦！坦白講、過往每當西狗闖禍就喊洋人練狗師出來頂過。由其是到咗理屈詞窮嘅時候、阿頭就會向挨「異」氣而孭鑊嘅洋人練狗師提供優厚補償作為揞口費、然後送他返祖家、算係事情告一段落。但身為金紫荊大總管連一隻西狗都管唔掂、試問那有本事再攀高一級、登上金紫荊阿頭寶座？雖然話、泛㒼今次嘅動機並不是真的為公義、而係假借西狗闖禍而炮轟抓錢華打擂台嘅潛在對手大總管冧井。但問題係、如果唔係有人故意鬆綁讓隻西狗去做出些鬼鬼祟祟嘅勾當嘅話、人家又憑啥去攻擊佢呢？總之西狗自出生之日起、就被政棍利用來做鬥爭工具。相信各位街坊對這一點、已睇得一清二楚了吧！因此對於今次發生嘅事、亦無須太過認真矣！