判官亦瘋狂

強闖硬幹喊冤屈

野蠻老爺把我拮

幸得官說無須罰

全城彷似食忽得

話說、荒唐縣唔淨止係判官荒唐、連刑部司都係咁荒唐、以致荒唐縣城為當今天下最荒唐嘅法治之地。有一次地保會進行閉門會議期間、白鴿標總會嘅小頭目痴瘋許“自恃該會持有一道護身洋符”帶同一班人企圖硬闖會議廳、並且與睇場組人員爆發身體接觸。在一攻一守過程之中、兩名睇場員報稱被痴瘋許嘅無影腳踢傷。結果痴瘋許被判官判處「自我約束」一年。後來痴瘋許不服上訴、並成功推翻「自我約束」嘅判決。刑部司便以預防痴瘋許再次爆暴為理由、向高級裁判堂申請對判決進行覆核。點不知高級判官問、係咪逢人就判「自我約束」才對？高級判官話、睇唔到痴瘋許係暴力之人、並所疑刑部司究竟要防啲乜嘢？

呢嗱、政棍未算可惡、法棍亦未算可惡、但係政法狀三棍加在一起嘅話、那就可惡到難以形容。法律呢家嘢、只要懂得點樣去玩、就可以玩到成件事轉晒灣、變成不問前因只問當前嘅格局。好似上述個案咁、當中明明係有人糾眾生事、明明係有人弄傷睇場員、咁都話滋事者並非暴力之人、到底係咪要鼓厲班人搞到死人冧樓才算數？不同人有不同見解本屬正常。判罰寬鬆亦無可厚非。但只憑一己之見而不顧真相嘅話、那就不大妥當矣！政治立場人皆有之、但政治與法治兩者之間是不應該有矛盾的。所謂明鏡高懸、就是真相只有一個、而且絕不受人類意志轉移。因此不可以把因果模糊、否則真相永遠不能見得到陽光。所謂法律不外人情、判官老爺在判決時有權行使酌情權、但將一名以暴力衝擊會議廳和令到別人受傷嘅人講成係非暴力之人、如何能服人？今次痴瘋許甩身、真係要多謝刑部司用咗一個戇居到唔戇居嘅理由去申覆才對。如果唔係咁嘅話、呢單畸屎嘅焦點就冇咁容易被扭轉、痴瘋許就要為自己嘅行為負責任了！我在想、假如有一日、有人違反閉門審訊令、糾眾強闖高級裁判堂和弄傷睇場員嘅話、唔知到判官老爺又會唔會判當事人啥罪都冇嘅呢、吓？！