你造王我搵銀

造王是假搵銀真

別怨登時斷六親

諸家建路吾家過

有人落疊扇風生

亂制指泛㒼一邊譏笑阿頭跑馬仔係特權小圈子嘅玩意、但另一邊又搏老命爭奪選委席位、簡直係精神分裂喎！另外又有人指泛㒼要造王、並呼籲所有架忌冷要齊心對敵、咪畀機會佢哋。唉、如果真係咁齊心、泛㒼又點會拿得325個選委席位、比上屆超出125席？當下泛㒼由茄呢啡躍升為第三主角、若然加上老搭檔資營取得嘅250席便有570席、佔總數47.5%。理論上、如果能再在亂制陣營中拉得2.6%人倒戈就sure win、即係贏硬架喇！之但係、亦有人話泛㒼造王係假、做生意才是真的。泛㒼大勝後、一面公開叫喊不排除投白票、而另一面又散播流言不打算派人上台參戰。這分明係商業宣傳格局、因為有人打算將手上嘅票擺上拍賣台由價高者得。無論是紅營或是資營那一方想贏、都必須好好的跟泛㒼商量一吓。呢趟都可謂嘅奇貨可居了吧！

在政治倫理上而言、泛㒼根本上不應該參與一個被他們認定為剝削街坊選舉權利嘅小圈子選委會、但他們卻以「改變小圈子選舉制度」為口號積極參與。如果咁都得、兩年前就唔使搞到封街鎖路七十九日咁大鑊啦！更可笑嘅就係大妖蜓居然公開鼓吹搞撕法公正、教唆泛㒼利用手上325票換取下屆揸拂人撤銷對「常無、小蟻老千、蟲蟲炎、三七螺」四人嘅資格覆核。呢隻妖蜓梗係食懵咗都未定、否則又點會對總舵頒布「欲當阿頭者必須嚴打講獨」嘅命令毫無知覺？坦白講、政棍拋得身出嚟搏、唔係講金、唔通講心咩？喊泛㒼將手上嘅提款咭當作依紙燒畀幾隻冤鬼、有冇搞錯？

在上次豬狼鬥期間、泛㒼以「寧要豬都不要狼」為號召、將62%嘅選票投給阿豬。可惜贏嘅係阿狼而唔係阿豬。因此今次是不容再失矣！從今次泛㒼人圍嘅增幅看來、肯定係有人讓路、亦即係話資營今次嘅議價能力此上次更強、形勢更加緊湊、那就難怪總舵要先使開施威這負資產了！從現實角度睇、有了左右中三方民選尊貴大力參與、若再有人再話小圈子冇民意基礎、等同當那群民選尊貴通通都係透明嘅。事情發展到呢個地步、只要唔係盲嘅人都會睇得很清楚、那些所謂「珍譜選」或「假譜選」亦是不過是政棍跟紅家討價還價嘅手段而矣！古人講得啱、所謂天下熙熙皆為利來、天下攘攘皆為利往吖嘛！照咁睇嚟、在下真係要向呢群“得米”嘅尊貴中尊貴提早講聲恭喜發財至啱喇！