不如改姓賴

講督老爺炒冷飯

屙屎唔出賴地硬

水客擾民人皆厭

莫將責任當麻煩

講督話、遊客多又被人鬧、現在遊客少咗又被人詐形。佢仲話、現在並唔係冇客源、只係城中蟻民嘅胸襟藏人家唔落、並且諷刺有人又要馬兒好、又要馬兒不吃草、咁係冇可能嘅喎！講督提醒蟻民、應該好好的想清楚到底須要幾多遊客才對。喂喂喂、督爺呀、督爺、早前蟻民唔妥嘅係嗰群滾水淥腳趕頭趕命嘅水貨客、現在店鋪老闆嫌少嘅亦都係水貨客而非一般觀光客。督爺嘅講法似乎將水貨客與觀光客混為一談喎！唔通佢近來改咗姓賴嘅？事實上觀光客與水貨客兩者之間係有天淵之別嘅。正常觀光客係絕對唔會打衝鋒咁拖住個篋橫衝直撞、更加唔會在一日之內來來回回跑數次之多。最歡迎這類擾民指數爆燈嘅水貨客、正正就是那群一窩蜂開店輔大做水貨客生意嘅老闆。但在受滋擾嘅蟻民眼中、那群水貨客就是有組織和有計劃嘅走私客。明未？

罪惡城之所以叫做罪惡城、其中原因就係官、商、民三方各說各話、以致牛頭不搭馬嘴、才會爆出連串鳩嗚和趕客等事件。若然話年初二上演嘅怒火街頭係唔關事、咁就真係乜都唔使講。冇錯、好多人都睇得出、初二暴亂係有人要造起個勢搏出位。但別忘記、那些被互聯網召喚出來嘅人並不一定係支持講獨、更多嘅就係谷氣谷到成隻焫雞咁款嘅人群。點解會咁？咪就係官民雞同鴨講嘅後果囉！社會搞到烏煙瘴氣、為官者別妄想將責任推到蟻民身上去。因為無論點睇、講府都係有推不掉嘅責任。要解決問題、就要對症下藥、更重要嘅就係絕不可再偏重任何一方、否則情況只會更加惡化。其實講府可以將個波交由垃圾會討論。但係要做、就一定要趁快。因為垃圾會目前正在大塞車、待決議案堆積如山、唔知要到幾時才能清貨吖嘛！其實蟻民是不會反對遊客入城觀光和購物、只要講府能夠保證民生不受拖累、蟻民出街時不會被拖篋黨撞個人仰馬翻、咁就唔會再有問題啦！係嘛？但問題係、講府有沒有面對現實嘅勇氣和魄力而矣！