抗議督千金

無憑欠證鬥一番

機場訪客運路行

開聲自有人和唱

望求九月喫多餐

飯盟與雞總（飛雞及地雞服務員總會）合辦、以抗議督千金仗勢欺人為題、嘅一場示威活動、於上周日在飛雞場上演、一眾飯盟老叔父和老叔婆均齊齊撐場、都可謂聲勢浩大矣！之但係、弊就弊在那位傳說中受到迫害嘅主角（托軚空運店小伙計）竟然拒絕臨場現身說法。俗語都有講啦、冤有頭、債有主吖嘛！現在連原告都冇、難怪有另一群愛字堆人馬跑到飛雞場反指、今次有被告冇原告、分明有人刻意將小事化大、目的是借勢獎督爺拖下馬、而非關甚麼濫權不濫權嘅事。依我睇、導致今次嘅羅生門事件不外乎兩個可能性。第一、正如咕哩幫幫主咬人李所講、小伙計害怕被人秋後算帳才不敢露面。第二、如嗌講之星揸拂人高大賓所言、當事人可能係督千金老子嘅粉絲才會作出特別服務都未定嘅。

根據有份參加示威嘅過氣大人代表豬柳倫講、牽涉在此事之中共有四五人之多、仲話當中有人提起此事嘅時候、講到聲淚俱下咁淒涼架！但係、人呢？點解連一個人都唔見？喂喂、豬老闆、你唔會係口噏噏當秘笈嘅、係嘛？話時話、咬人李做咗幾十年咕哩喱頭、點解今次會搞到連原告都冇、就晒馬畀街坊睇、咁失策架？就算件事半點不假都冇用、因為原告和證人都冇就係名不正而言不順、好難怪別人到場唱反調嘅。照咁睇嚟、飯盟班老叔父除咗向贊助人交功課之外、就係想憑藉呢趟騷吸引一下眼球、好讓街坊記得他們才是正義之士、並希望在九月嘅“垃圾會筍盤”擂台爭霸戰時、各位街坊和擁躉多多捧埸。嗱、唔係在下想潑冷水、呢班耆英近年行路打倒蹆衰咗畀班塞豆窿、而且連續幾年犯太歲、以致天時、地利、人和皆失、基本上係完全不利於打擂台嘅。如果我係佢哋其中一分子嘅話、就寧願棄權讓位給年輕一代、免得在擂台上被人打到一仆一碌、而令自己晚節不保咁悲哀吖嘛！看來、我講嘅話都係冇幾人會相信架喇！既然係咁、不如大家走着瞧吧啦！