狼狗鬥一番

禦狼碰上花癲狗

道理唔通便講手

走入衙堂翻舊帳

話我醜時你仲醜

呢嗱、相信講古佬你就見得多。但係講古講到連當今天子都要封個官畀佢做嘅講古佬、唔知你又見過未？話說、年前罪惡城發生一宗掟波羅奇案。事緣江湖人稱善辯狼嘅禦用講古佬在榕樹頭開講其間、有一名綽號花癲狗嘅聽眾無端端扯起火來、並拎起隻波羅捩手向講古佬掟過去。只見波羅疾飛如電、並在講古佬身邊不遠之處落地開花、登時波羅釘四射、幸好未曾傷及任何人。之不過、講古佬條氣就十分唔順、於是喊人報巡捕房、指花癲狗企圖襲擊佢。就係咁、一狼一狗便鬧到上公堂矣！

呢嗱、講古佬告花癲狗大概係想教訓吓佢、讓佢知到冇大冇細有乜嘢後果。但係勢估唔到、呢單嘢居然會有出人預料嘅發展。在公堂上、花癲狗嘅身份既係被告人亦係辯方狀師、所以佢有權召原告人講古佬步上證人台接受盤問、而且一盤就是三日。期間花癲狗十足十荒唐鏡上身咁款、對住講古佬左問右問、係又問、唔係又問、總之問到人家火都嚟埋。老實講、無論呢一仗結果係輸係贏、花癲狗都賺咗架嘞。事關花癲狗三戲講古佬已經成為全城熱話、人氣贏到盡唔在講、而且仲夠晒頂癮添。睇嚟、呢趟講古佬都可謂計錯數。坦白講、作為奉旨喫四方飯嘅人、點都應該要有幾分容人雅量至係嘅。就算冇咁大方都唔緊要嘞、但係危機感呢家嘢係決不可冇吖嘛！人同狗鬥已經係不智架啦！何況面對嘅仲係一隻發緊花癲嘅狗？真係贏咗都有失身份啦！要修理隻蠱惑狗、就要用蠱惑仔方式對付才行。即係等隻狗真係咬傷自己之後便來一招死牛𨂐地、咁樣捕快就可以名正言順落孖葉鎖佢返巡捕房。更重要嘅就係、唔會有幾多人願意去冒天下之大不韙、而企出來撐一個行兇者吖嘛！呢嗱、如果最終係告唔入嘅話、肯家笑死街坊添啦！係冇？！