特薯特笨

無厘無頭滿天驚

江湖追殺冇人情

嬲得阿爺狂拍枱

打倒施威喊不停

日前保安大隊長話、空運公司職員替細小姐送個篋入機場禁區係特事特辦。呢嗱、問題就係在於“特事特辦”呢四個字身上。因為呢句話嘅潛台詞、就係非一般做法。按照今次情形看來、即係擁有特殊身份嘅人、就能享受特殊服務。可惜在今日仇富仇官嘅社會裡面、即使細小姐在要求被拒之後按照正確程序解決此事、但只要消息外泄、同樣有人大造文章狂轟濫炸一番。吓、點解？咪因為佢係督爺千金囉！所以話啫、在呢個惡劣嘅政治環境裡面、越係有權勢嘅人、越不可使用特權、否則必定會被有心人“特事特辦”一番架喇！

呢嗱、橫睇、掂睇、都見唔到亂制裡面有誰是為督爺兩肋插刀嘅朋友。相反、那些一啖沙糖一啖屎、又或是暗中在他背後伸一腳嘅人就多到數都數唔掂。例如某人指出、空運公司職員替細小姐送個篋人機場禁區沒啥大不了、但又點出督爺嘅解釋前後矛盾、而令到坊間產生疑惑。咁講法、究竟係幫抑或係踩多腳、相信大家都心中有數。另外又有人話自己當權貴之時、就教曉子女做任何事都不得有特權。如果話、呢種講法唔係明寸督爺連個女都教唔掂、究竟又係表達些甚麼？江湖上盛傳、各方投家已經下令、咬住呢單嘢全方位追殺落去。日前某政客喊保安大隊長提交書面證明、證實空運公司職員代客帶行李進入機場禁區係冇問題嘅講法、好讓市民息疑喎！喂喂、如果有明文規定又點算得上係特事特辦呀、大佬？此君身為狀師冇理由唔曉、提出咁嘅要求純屬玩嘢。依我睇、既然大家都有共同理由要做齊督爺、咁就爽爽快快在垃圾會進行彈劾迫佢執包袱啦！再唔係、就索性與講獨聯手、執劑玉石俱焚畀街坊嘆、然後賴係督爺迫出來嘅、如果咁都趕佢唔走、咪自己走囉！係冇？！