行李門背後玄機

車完大炮放飛機

被人篤爆嘆倒楣

勝在荒唐兼異相

陰謀背後笑嘻嘻

自從行李門事件曝光之後、飛雞工會一直以有人無視國際安全規定、向小職員施壓提供不合理服務。究竟在此事之中是否有人違法和違規呢？據日前垃圾會尊貴兼資深狀師韋進在一個電台節目中、就行李門事作出分析。他指那件行李是由航雞公司職員攜帶並透過安檢、然後才交到物主手上、法理上並無違反“同行同檢”規定、但若然行李有問題嘅時候、有關職員就要付上法律責任。因此問題重點並不在於安全問題、而係誰授權予有關職員替乘客攜帶行李通過安檢。但飛雞工會代表死撐話、過去案例中嘅失物都是電話、護照、證件等。呢嗱、呢啲咪就係鬼拍後尾枕、連唔講嗰句都講埋出嚟囉！試問一聲、如果遺留護照或證件、物主又焉能進入禁區呀？照咁睇嚟、呢單嘢都係針對人而非針對事。

話時話、究竟施威做錯咗啲乜嘢、而咁唔得人鍾意呢？答案就係、佢嘅角色明明係揸拂人、但係佢好做唔做、偏偏要落場去做鬥士。咁搞法、又點會唔係通街都係仇人呢？行李門事件鬧到翻天覆地、原來一直都只係由第三者憑空指控。既然咁都得、試問仲有乜嘢荒謬嘅事唔可以發生？例如吹水唔抹嘴嘅豬柳倫咁、只憑一個傳說便一口咬定某人以大欺少。有政黨背景嘅飛雞師和飛雞工會明明知到行李門事件並無違反法則、亦無構成安全問題、但係都要斷章取義大鬧一番、而且仲話晒冷行動陸續有來、如果咁都話背後冇政治目的、咁就搵鬼信都得嘞。今次行李門事件之所以能夠單憑hearsay就鬧到滿城風雨並唔係偶然、而係撞棍幫和咕喱幫躲在幕後合力炮製的一個超級政治炸彈。嗱、千祈咪睇少呢個炸彈呀！因為江湖上已經流轉、有人借呢個炸彈去摧毀施威冧莊嘅企圖之外、還要趁勢搞臭埋一班政治對手、以求中和自己一身蘇州屎所發出嘅臭氣、到時就可以在“互臭”嘅情況下公平競爭今秋垃圾會嘅筍工啦！既然係一為神功、二為弟子、就算卑鄙啲都要啦！係嘛？！