報紙館風雲

你威不及我威威

我企高時你跪低

呢個老闆無叉用

馭狗無方被狗噬

呢嗱、眾所周知、盟報嘅員工係出名夠惡。無論上至行政決定、下至人事變遷、大老闆講過都唔算數、總之員工唔鍾意就打起維護新聞自由旗號、實行集體逼宮。呢種恃人多而令老闆嘅行為、已經司空見慣。早前該報裁走一工頭、幾名專欄作家便帶頭在其專欄開天窗（交白卷）以示抗議。當資方要封窗時、職工會卻斥之為打壓言論自由。但江湖流傳、在那位工頭領導之下、盟報嘅業績不斷下滑危及公司利益。如果係真嘅話、資方裁員亦只係商業行為、根本上與新聞自由毫無關係。但係嗰班員工居然勾結咗七八個幫會來鬨其老闆。喂喂、人家間報館係私辦企業、唔似得公家電台咁、任憑班馬騮舞架！既然係做得唔開心、咁就劈炮咪鬼撈啦！再唔係、就索性買起間報館、到時莫講話開幾個天窗、即使成份報紙“白炒”都得啦！係冇？

呢嗱、唔知各位街坊會唔會覺得、上述事件熟口熟面係曾相識咁呢？冇錯嘞、咪就係講錯電台翻版囉！一個由納稅人供養嘅公家電台居然變成為飯盟喉舌、簡直係豈有此理。須知到每個納稅人都有自己嘅個人政治立場、因此作為公家電台、無論員工個人政治立場係點都好、都應該保持政治中立才對得起所有供養佢哋嘅人們。假如執法機關學足講錯電台、咁我哋嘅社會仲成世界嘅咩？有人質疑、點解講府仲唔出手去撥亂反正？答案是有難度。因為講府本身有政治立場、除非有明文規定、否則難以將個台重新納入正軌。注於盟報嘅老闆何故寧受伙計氣都唔將之摺埋、恕在下無知唔識答。但係我卻想起N年前一群志願慈善團體社工頻頻借題發揮、教唆受惠群眾上街抗議主辦機構刻薄。終於搞到大老闆面目無光、最後將個慈善機構摺埋。就係咁、本來受惠嘅群眾便失去支援、而那群社工亦冇咗份工。呢啲咪就係損人不利己嘅鐵證囉！依我睇、盟報員工惡得咁交關、遲早迫到老闆將間報館摺埋、到時盞攞嚟衰架咋！知冇？