行李風波

阿女不依規

老父局挨批

滿場皆亂棍

早晚聽趴低

呢嗱、據說在幾日前督女進入機場禁區之後、才發覺自己件隨身行李遺留在禁區之外、於是要求航空公司地勤人員替她取回。期間身在現場嘅督太亦跟地勤人員交涉、而督女忽然將電話遞給地勤人員、直接跟電話裡面嘅督爺對話。後來由一名具有大撞幫背景嘅飛機師發動聯署向國際民航協會、國際機場協會、國際空混協會投訴、指機管廳聲稱航空公司職員替顧客送行李冇問題、是不合乎“同行同檢”嘅安全程序、並要求三大組織加入追究。雖然機管廳證實行李是經過檢查之後才交予督女、但一宗瑣碎嘅事就此變成國際大新聞、更加焫㷫埋班垃圾尊貴要求垃圾會開堂徹查、看看是否有人以大欺小。呢鋪都可謂陸雲霆睇相、唔衰攞嚟衰咯！

聽講話、如果督女當時肯補辦進出禁區手續和親自去認領行李嘅話、件事就唔會牽涉到督爺、亦唔會搞出咁多是非來。注於當中有冇人運用特殊身份欺壓地勤人員、除非當事人現身說法、否則只係口同鼻拗、點都唔會拗出真相來。在正常情況之下、當一個人成為眾矢之的嘅時候、應該知到分分鐘都被人𥄫到實、所以一言一行都會有所警惕至係。從這角度睇、實在難以想象出名城府深嘅督爺會忽然智障、在「講督擂台大賽」距今不足一年嘅敏感時期內、為這種芝麻綠豆之事而擺自己上枱任人劏。注於督太和督女在事件中所持嘅態度如何自有公論、恕在下不敢妄加批評。姑勿論今次是否有政棍在事件背後刻意炒作、但古語都有講、齊家治國平天下、在這方面而言、恐怕督爺嘅得分都唔慌高得去邊度。不過從另外一個角度去看此事、今日政壇十足十係一個八掛娛樂圈。總言之、大事做不來、小事鬧翻天、冇齣好戲就係啦！再係咁搞落去、這棵金紫荊遲早都會被搞殘、真係睇見就眼冤啦！係嘛？！