為暴力開脫

應斷而不斷

勢必遭其亂

靠害當幫忙

遲早遭天譴

前晚我與幾位朋友在龍門客棧嘆夜茶時、無意中聽到隔離枱幾名茶客正在討論有關“城中三棍（政棍、學棍、狀棍）聯手為本地勇武兄弟早前作出嘅暴力行為開脫”嘅事。當中有人話、若能成功把暴動演繹成是官迫民反而演變出來嘅一場公民抗命、肯定會改變全城黑世界社團嘅命運。因為按照三棍嘅邏輯去推算、就算社團兄弟糾眾在公眾地方封街鎖巷兼收片都冇有怕、只要撒賴係官迫民反就登時會變成公民抗命、到時就真係和尚打傘、無法無天喇喎！

呢嗱、以上幾位仁兄講嘅話、初初聽起來雖然有啲戇居夾耳聾嘅感覺。但諗落又唔似係純粹發噏風嘅。事關人嘅忍受能力是有限的、當忍耐去到極點時就很容易衍生出暴力念頭來。所謂怒從心上起、惡向膽邊生、暴力就係咁樣爆發出來架喇！坦白講、壓力呢家嘢、受者絕唔止係基層大眾、連長期唔見得光嘅黑世界社團兄弟都要忍受架！例如同樣係從事非法販賣勾當、無牌小販就可以公開在街道上叫賣魚蛋、牛什、臭豆腐等、被捕時亦只係被充公貨品和被罰銀両。但係從事賣冰、賣粉、賣丸嘅黑世界兄弟、就只能在黑暗之中鬼鬼祟祟咁賣。萬一有人因「泛讀」而被捕嘅話、除咗貨物被充公、當事人還要坐花廳架！再講啦、同樣都係參加戰中之嘛、嗰班書生靠把口係又噓、唔係又噓、咁就被成為人民英雄。之但係、社團兄弟排在第一線打到肶都甩埋、無人稱贊都冇唔在講、嗰啲衰咗嘅兄弟仲要被人話抵死。咁你話嘞、算起來誰的怨氣比較大？因此、假如今次三棍成功爭取得到將暴力行為入埋公民抗命嘅數、而市民又認同嘅話、確能大大造福於社團兄弟。到時只要食住條水、嗱嗱聲將社團登記為政黨、便可以來一個大翻身。以後就無須再蒙住塊面唔畀人見、而「王倒讀」仲可以跟「講讀」一樣、像雨後春筍般的展現在廣大市民眼前架喇！唔知大家又點睇呢單嘢呢、吓？！