狂言

黃傘藍遮費事拎

登台扮鬼眼矎矎

天生仰慕條條捹

究竟誰是戇居丁

各位街坊、我係本無前（本地無知前線）嘅揸拂人讓提煌。當你哋聽到呢段錄音嘅時候、我都唔知自己瞓醒未。我哋本無前一班手足在大年初一連利是都冇逗、就跑去幫小販夜市睇場、並且趕走人侵嘅城管、以及打殘架樑嘅巡捕、都可謂千年怨氣都替班小販出埋。但自從坊間陸續傳出不利本無前嘅錄影片段之後、班小販唔止唔感激我哋、反而跑了一個甚麼「講狗新戒飯箱聯會」嘅代表出來、誣衊我哋係破壞社會安寧嘅暴徒。喂喂、咁講法、太冇義氣喇！真係幫嚿叉燒、都好個幫你哋咯！

本無前嘅會章開宗明義、闡明我哋係勇武抗爭份子。我哋一向堅守着“我罵、你不得還口。我打、你不得還手”嘅宗旨。例如在勇武戰中、勇武反水客、勇武鳩烏、勇武反東北、勇武反西南等莫不如此。今次我哋除咗趕走城管、以及打殘捕快之外、仲連記者都㩧濕埋、成績真係有目共睹架！坦白講、若非巡捕房班友衝入小販夜市阻頭阻勢嘅話、就唔會焫㷫我班手足、更加唔會爆發衝突事件。呢幾日坊間陰謀論盛傳、可能有人在抗暴過程之中施行反間計、聘用一班本地流民地踎佯裝暴徒、並刻意在攝影機鏡頭前分發武器、繼而襲擊攝影記者、然後再嫁禍給本無前。但係我可以好肯定咁話畀你知、嗰啲通通都係子虛烏有嘅謠傳、千祈唔好相信。不過像痴瘋、受難可、常無等人所講“一切都係城督長期挑釁飯盟而產生出來嘅必然後果”就確係珍珠都冇咁真。所以我決定咗、如果刑部膽敢請本幫兄弟去坐花廳嘅話、我地本無前寧為肉醬、不作瓦「缶掌」、整煲杰嘢過大家嘆。各位街坊、無論你贊誠與否、我都預埋你哋一份架喇！知冇？！