冇齣好戲

橋到盡時又翻閹

總知做到禮義廉

無奈勢成水火格

紫城內望冇前瞻

相信係人都睇得出、反盟頻頻喊重啟「症治改革」和重新開放佢哋口中嘅「聞煮講場」、即係揸拂堂大樓東翼的那塊空地、目的就是為「二戰」做準備工作。江湖流傳、過氣番督肥彭、唱衰班成員買田李、陳四姑、以及戇痴瘋等人奉花大叔之命到花家出席「唱衰金紫荊」聽症會。傳聞亦顯示、花大叔將會派人跑到金紫荊大歸廿周年慶祝酒會門外擺設馬桶陣、並以集體開大為紅家會助㷫。聞說戇痴瘋將會被捧為「二戰」主角。所謂食粥食水就要睇呢一鋪、相信戇痴瘋今次唔會再揸流攤啩！可惜紫荊人被「一戰」嚇得人人膽戰、個個心驚、冇鞋拖屐走。因此在下相信、在正常情況下「二戰」未必能夠收個滿堂紅矣！

聽講話、㒼陣將會在嚟緊嘅七一唱反調大遊街打起民生旗幟、而政治議題只會放在次要位置上。如果消息屬實嘅話、除非現任阿頭能夠在老走之前做番幾齣好戲出來𧨾街坊、否則新阿頭都幾難招架咯！目前紫荊城最大嘅問題就是工資追不上租金。由「沙屎」一役至去年底嘅十三年內、薪金增幅40%、而租金升幅卻是150%、反映出在職貧窮越來越嚴重。有資料顯示、租一個四尺闊“棺材式”床位每月租金大概須要3500 - 5000元。揸拂堂頻頻賣地建私屋、但係冇地興建公居。揸拂人推出嘅「辣椒」帶挈大帳房在本年度印花稅收益錄得735億元。比起上個財政年度、本年度嘅物業稅收大幅飆升31.6%、合共90億元。雖然有人批評「辣椒」旨在搵銀、但揸拂堂卻以「別以為取消“辣椒”地產商就會將樓宇降價出售」來反駁。既然揸拂堂有咁獨特嘅睇法、無殼街坊惟有繼續為租金挨世界好了！呢嗱、住屋問題越搞越打倒蹆都唔在講嘞、當下連假難民問題都搞到烏煙瘴氣。連日來、涉嫌有黑幫背景嘅南亞裔「爛民」爆發連場廝殺。咪話在下靠嚇、若然再係咁落去、班街坊必定會越來越扯火。如果反派趁勢火上加油嘅話、遲早都會爆鋪勁嘅。等着瞧啦！