出口成扑

阿姐一開口

誰敢認泰斗

大事欠揸拿

偷雞要就手

呢嗱、今日嘅新一代垃圾尊貴、果然比那群守舊嘅棍壇老鬼有出色得多。就在日前之嘛、垃圾新貴遊藝精出席李公大教館論壇時指出、當下城中年輕人連「扑嘢」嘅地方都冇、登時引發全場嘩然。但遊藝精卻不慌不忙、並解釋皆因年輕人收入低、畀唔起昴貴房租、所以才會搞成咁嘅喎！喂喂、藝精姐、有冇咁嚴重呀？依妳所講、莫非要為年前一對大學徒在大教館門外行人路邊當街扑嘢翻案乎？之不過、無論藝精姐所講嘅話有冇根據都好、就憑她今次夠膽憑藉「扑嘢」而令自己個朵紅遍棍壇、就足以令在下佩服。須知到、經此一扑之後「扑嘢姐」呢個外號恐怕以後想搣都搣唔甩架喇！

記得在大選期間、癲狗教頭公開譏諷扑嘢姐、指她靠個樣就學人在棍壇上掙飯食、簡直係不知天高地厚。之但係、事實證明扑嘢姐就是憑個樣就把呢一位棍壇老雀殺敗。無它的、一切皆因自以恃爛盡天下無敵手嘅癲狗教頭當時犯了「知己而不知彼」嘅嚴重唔錯誤、才弄得一敗塗地。假如癲狗教頭早一點把握得到扑嘢姐係不文界嘅女中豪傑嘅話、係絕對唔會輕敵成咁嘅。所以話啫、現代嘅後生仔女係冇得估嘅、分分鐘都可能會有驚喜的。任何人恃老賣老、滿以為一定食硬班後生仔女嘅話、下場都會跟癲狗教頭一樣、連輸喺邊度都唔知到。坦白講、癲狗教頭嗰套早已經落伍架喇、今日連一個初出茅蘆嘅女生都敵不過、都係趁早摺埋為之上算。呢嗱、咪話在下靠嚇、小心有人喪起上來、搞一趟扑嘢革命、召集萬人上街佔據馬路中間、並且實行集體露天扑嘢三個月、以示抗議揸拂當局劫貧濟富、而令到後生仔女連扑嘢都要大公開、到時就真係唔知點收科。按情形睇嚟、此妹尚有「大把」在手、當時機成熟時就會一招一招使出來的。吓、唔信？嘿嘿、如果閣下知到她背後嘅高人是誰、就會有不同想法架喇！嗱、呢屆垃圾會幾荒謬嘅事都會發生架、不如擔定凳仔等戲睇啦！